Shillong, Nailar 06 : U kyrtong MP jong ka Voice of the People Party (VPP), u Prof Batskhem Myrboh, u la pynpaw ia ka jingsngewskhem ba ka VPP kan jop beit ha ka elekshon MP shiteng samoi na Shillong Lok Sabha constituency.
Haba kren bad ki lad pathai khubor, u Prof Batskhem u la ong ba ka VPP ka tip bha ïa ka politik jong ka, ki mat ba ka ïeng bad ka bor jong ka. Kumta, um shem ba ka don kano kano ka jingma na kiwei pat ki kyrtong kiba ïakhun.
“Ka jingkyrshan ïa ka VPP ha Rilum Khasi -Jaintia ka la dang kiew, namar ka party ka ïeng halor ka politik kaba khuid bad ki mat kiba ktah ïa ki paidbah,” u la ong.
U la ong ruh ba ki paidbah ki kyrshan ïa ka VPP namar ki sngewthuh ïa ki nongrim, ki polisi bad ki mat treikam jong ka party. Katkum jong u, ka VPP kam shym la duh ïa ki nongkyrshan hynrei ka dang ïoh bun shuh shuh ki nongkyrshan.
Haba kren halor ki khubor ba bun ki dkhot ki la iehnoh ïa ka party, u kyrtong u la ong ba naduh ba la seng ïa ka VPP ha u snem 2021, ka party ka la nang san bad ka la ïoh ruh ban jop ha ki elekshon da ka jingiai bteng ka jingkyrshan jong ki paidbah.
“Ka jingkiew jong ka party bad ka jingjop ha ki elekshon ki pyni hi ïa ka bor bad ka jingshaniah jong ki paidbah ïa ka VPP.”
