SHILLONG, Nailar 06: Ka All Meghalaya Karate-Do Association (AMKA) kan ïashim bynta ha ka 20th All India Independence Cup Karate Championship 2026 ha Talkatora Indoor Stadium, New Delhi.
Kane ka lympung kan sdang naduh lashai ka sngi Thohdieng, kata ka 07 tarik Nailar haduh ka 09 tarik Nailar, 2026, bad ka AMKA ka la jied ïa ka kynhun kaba don 61 ngut ki nongïalehkai ban mihkhmat ïa ka jylla.
Ka jingleit ïashim bynta jong ka AMKA sha kane ka championship ha New Delhi ka bud tang hadien ka jingïalehkai kaba jop ha ka Indian Challenger Cup 2026 ha nongbah Kolkata, ha kaba ka jylla ka la khur haduh 88 tylli ki takma.
Yn synran lang ïa ka kynhun sha katei ka lympung da u Arjun Sewa, u Edwilbert K Nongkynrih, u Pynhunlang Kharbuli bad ka Sharai Nongneng Shanpru.
Lah ruh ban kdew hangne ba ki don 27 ngut ki nongïalehkai karate na kane ka kynhun, kiba hap hapoh ka Team Preparation Programme na ka bynta ka 39th National Games 2027 kin ïashim bynta lang ha kane ka championship.
Ka jingïashim bynta jong ki ka long shi bynta jong ka Exposure Camp ba la mynjur da ka tnad ïalehkai, kaba thmu ban ai ïa ka jinghikai kaba kordor bad ban ïarap ïa ki ban pynkhreh na ka bynta ka 39th National Games 2027, ka ban long ha Meghalaya.
