Shillong, Nailar 5: Ka District Election Office (DEO), East Khasi Hills, ha ka sngi Balang ka la pyllait paidbah ïa ka Draft Electoral Rolls jong ka District ha ka jingialang kaba la long ha Conference Hall jong ka ophis jong u Deputy Commissioner ha Shillong.
Haba kren ha kane ka sngi, u Deputy Commissioner bad u District Election Officer u Abhilash Baranwal, IAS, u la ïaroh ïa ka jingtrei shitom jong ki nongtrei ka elekshon, kiba kynthup ïa ki Booth Level Officer (BLOs), ki nongïarap ïa ka BLO, ki Electoral Registration Officers (EROs), bad ki Assistant Electoral Registration Officers na ka bynta ka ka jingpyndep intensive electoral roll revision hapoh shi bnai.
U Baranwal u la ong ba ïa kane ka jingleh, kaba kynthup ïa ka district baroh kawei, la pyndep da ka jingminot bad ka jingtrei shitom katba pynthikna ba ki nongjied kin ïoh ïa ka jingkyrshan kaba donkam ha baroh kawei ka jingïaid lynti.U la kdew ba watla ka kamram ba kongsan jong ki BLO ka long ban sam bad lum ïa ki phorm, hynrei bun ki heh ki la iaid lait ia ka kamram ba la bynshet ha ki da kaba iarap ia ki nongthep vote ban pyndap ia ki phorm bad ban weng ia ki jingeh jong ki.
“Ki heh ophisar ki la leit jngoh hi dalade ïa ki longïing bad ki la pynlut por shibun ban ïalam ïa ki nongjied ban pynthikna ba la pynbeit ïa ki jingsngewkhia bad ki jingartatien ha kaba ïadei bad ka Special Intensive Revision (SIR).Ka jingpyrshang jong ki ka la ïarap ban pyndep ïa ka jingleh da kaba jop bad ka la pynmih ïa ka jingshaniah ha ki paidbah,” u la ong.
U District Election Officer u la pynpaw ruh ka jingsngewnguh ïa baroh ki seng saiñpyrthei kiba la ïatreilang, da kaba pynpaw ba ka jingkyrshan jong ki ka la pynthikna ïa ka jingïaid beit ïaid ryntih jong ka jingleh, da kaba mih tang ki jingeh kiba rit, baroh la pynbeit kloi lyngba ka jingïasngewthuh jingmut lang.
Shuh shuh u la ai khublei ïa ka bynta kaba kongsan ba la leh da ki Booth Level Agents (BLAs) ha kaba ïarap ïa baroh ar ki nongjied bad ki BLO ha ka por ba pynthymmai.
U Baranwal u la ong ba ïa kane ka thong ym lah ban pynurlong khlem ka jingiatreilang jong baroh ki nongshim bynta bad u la ai khublei ïa baroh.
Shwa kane, u Assistant Systems Engineer u la ïathuh lyngkot halor ki bynta kiba hadien jong ka jingpynkylla ïa ka thup kyrteng nongthep vote.U DEO u la kyntu ia ki nongjied bad ki nongmihkhmat jong ki seng sain pyrthei ba kin leit sha ki BLO bad ki heh elekshon lada don kino kino ki jingartatien ne jingkylli ban ïa kaba iehnoh khlem da pynbeit, da kaba pynthikna ba ka mashin elekshon baroh kawei ka dang don ban ai jingshai bad jingiarap.
Ka District Election Office ka la pynpaw ka jingshaniah ba kajuh ka kyrdan jong ka jingiatreilang na baroh ki nongshim bynta kan dang ïai bteng ha ki bynta ban wan jong ka jingpynkylla ïa ka thup nongthep vote.
Hadien kane la aiti ïa ka Draft Electoral Rolls sha ki nongmihkhmat jong baroh ki seng sain pyrthei ba kin ioh ban peit bniah.Ka por ban thep ïa ki jingdawa bad jingpyrshah kan sdang naduh ka 5 tarik u Nailar haduh ka 4 tarik u Nailur, katba ka jingpynmih kyrteng kaba khatduh ïa ki Electoral Rolls la buh ban long ha ka 7 tarik u Risaw, 2026.
