Ka khajna na ka OTS ka la tam 20 klur tyngka, lah ban poi 200 klur tyngka hashuwa 31 Nailar: Dy CM

Shillong, Nailar 5 : U Symbud Myntri Rangbah ba khmih ia ka Tnad Transport u Ma Sniawbhalang Dhar ha ka sngi Balang ula ong ba ka One-Time Settlement Scheme ka Sorkar na ka bynta ki kali ka la ïoh lum pisa ïa palat 20 klur tyngka haduh mynta bad la khmih lynti ba kan kiew hashuwa ban kut ka jingbuh por ba 31 tarik Nailar.
“Haduh mynta ngi la dep tam ïa ka 20 klur tyngka tam. Kyrmen ba ki trai kali kin wan shakhmat tad haduh ka sngi ba khatduh” ong u Ma Sniawbha.
U ïathuh ba ka Jylla ka lah ban ïoh ïa kumba 200 klur tyngka ka khajna lada baroh kiba khlem siew kin wan mih shakhmat.
“Ka lah ban kot sha ka 200 klur. Ngam lah ban ong. To ngi ap katba ka jingkheiñ ka dang ïaid man ka sngi” ula ong.U Ma Sniawbha ula kyntu ïa ki trai kali ba kin shim ïa kane ka skhim, haba ong ba kawei na ki jingtyrwa kiba biang eh jong ka Sorkar.
“Kam dei ka jingduhnong jong ngi lada kim shim. Ka shong ha ki. Nga thikna ba kan kot ïa ka 80-90 percent kiba shim” ula ong.