Kyrshan ka JNC ïa ka jingbuh por ka KSU halor ka Jingpynsngew Paidbah ka Shree Cement

Khliehriat nailar 05: Ka Jaiñtia National Council JNC, Central Executive Committee lyngba ka Publicity Cell ka la pynpaw ïa ka jingsngewkhia kaba jur halor ka rukom pynlong ïaka public hearing kaba long myn ha ka 31 tarik u naitung 2026, kaba ïadei bad ka jingthmu ban tei ïa ka projek jong ka Shree Cement hapoh Elaka Nongkhlieh, East Jaiñtia Hills “Ngi ai ka jingkyrshan kaba pura ïa ka Ultimatum kaba 15 sngi ka ba la pynmih da ka Khasi Students’ Union (KSU) sha ka Sorkar Meghalaya, da kaba dawa ba dei ban pynduh bad pynsdam noh ïa ka public hearing” ong u kyrwoh na ka JNC.
“Dei ruh ban pynbeit ban don ka jingkitkhlieh kaba biang na ka bynta ka jingpyniaid jong ki bor ba dei peit ïa ka public hearing kaba long myn ha ka 31 tarik u naitung 2026, khamtam eh ha ka jingjia kaba la iohi lyngba ki khubor kiba la mih hadien jong ka jingpyni bor bad shah thombor ki paidbah, khamtam ki nongpyrshah na ka Elaka Sutnga bad elaka Nongkhlieh, ki jingshah khang lynti na baroh sawdongbha ka sngi public hearing”
“Ka public hearing katkum ka aiñ jong ka mariang (environmental law) ka long ban pynthikna ïa ka jingiashim bynta kaba laitluid, kaba hok bad kaba don jingmut jong ki briew kiba shah ktah, hynrei kaba sngewsih pat ka long ba la khanglad ïa ki trai jaka, ki nongrep, ki nongshong shnong bad ki nongpyrshah ban iashim bynta bad ha kaba la kynnoh ba la pyndonkam da ka bor ha ka rukom kaba pynduh ïa ka jingshaniah jong ki paidbah, ka jinglong hok jong ka jingleh baroh kawei ka ieng ha ka jingma kaba khraw”.
Na ka liang ka Jaiñtia National Council ka bynrap shuh shuh da kaba ong ba ki khubor hadien ki pyni ba kane ka jingjia ka la paw ba dei ka jinglehbor, ka jingshahkem ki sengbhalang bad ki paidbah, ka jinglynthem maw ïa ki paidbah, ki jingkhang surok, ka jingpyndonkam da ki lyer pynbthei, lyer pynsat khmat bad ki jingjia thombor kynthup ïa ka jingpynjot ïa ki kali bad ka jingtih ïa ka surok PWD da ki nong kyrshan ïa ka public hearing jong ka Shree cement, halor kine baroh ka seng ka dawa ban don ka jingbishar bniah kaba khlem shah liang da ki bor ba dei peit ha shwa ban shim ïa kano kano ka sienjam kaba kham bniah halor ka nongrim jong kato ka 31 tarik u naitung 2026.
“Ha kine ki jinglong jingman, ka jingdawa ban pyndam ne pynduh noh ia kata ka public hearing ba la kdew, kam dei kaba khlem nongrim; hynrei, ka long kaba donkam bha na ka bynta ka jingmyntoi jong ka jinglong hok ha ka rukom treikam, ka jinglong hok ban pynneh pynsah ïaka hok ki paidbah bad ka mariang, ka jingshaniah jong ki paidbah bad ka jingiada ïa ki hok synshar paidbah ha ka jaka jong ka Sixth Schedule.Kumta ka sorkar Meghalaya lyngba ka tnat Meghalaya State Pollution Control Board, bad ki bor synshar district jong ka East Jaiñtia Hills ki dei ban leh kyrkieh ban pynduh noh ïa ka public hearing kaba la long ha ka 31 tarik u naitung 2026, ban tohkit laitluid halor ki jingkynnoh ba don ka jingkhanglad, ka jingleh donbor bad ka jingpyndonkam bor kaba ïadei bad ka hearing, kumjuh ruh ban pynthikna ba ym don kano kano ka sienjam kaba pynbor ne kaba pynshitom bein pyrshah ia ki nongshong shnong bad ki sengbhalang, kiba pynmih ia ki jingpyrshah katkum ka ain, dei ruh ban pynthikna ba kano kano ka jingïamir jingmut paidbah ha ka lashai yn pynlong katkum ka aiñ da ka jingkhuid kaba pura, kaba shngain bad kaba ïa biang lang na ka bynta baroh ki nongshim bynta kiba shah ktah”.
“Kane ka kam kadei tang ia kawei ka hearing, ym dei ban iaid lait bad ka jing iadei bad ka jinglong ba janai jong ka jingshim rai halor ka mariang, ka hok jong ki trai ri trai muluk bad ki nongshong shnong bad ka jingkitkhlieh jong ka Jylla ka dei ban long kaba pawshai ba ka long pdeng ha kano kano ka jingpyntreikam kaba ktah ïa ka khyndew ka shyiap, ka hok jong ki paidbah, ka jingpynneh mariang, bad ka jingshaniah jong ki paidbah”
Ka seng ka khmihlynti ba ka sorkar kan jubab kloi hapoh ka por ba la buh ïa kane ka Ultimatum bad kane ka long kaba donkam bad kaba donkam kyrkieh bha ban ïada na ka jingkulmar kaba kham jur bad ban pynphai biang ïa ka jingshaniah ha ka synshar aiñ bad ka jinglong hok khamtam ha kaba ïadei bad ka hok jong ki paidbah” pynkut u kyrwoh na u bah M.Sukhlaiñ, uba dei u Publicity Secretary jong ka JNC.