Shillong, Nailar 05: Ka Laitkor ka la wanphai na ka shi kol ban pynliem ïa ka Mylliem da 3-1 ha ka jingïalehkai kaba hynñiew jong ka lympung Shillong Premier League 2026 hynne ka sngi Balang, ha madan First Ground, SSA Stadium.
Ka Mylliem ka la ïoh ban lamkhmat ïa ka kylla step lyngba ka kol jong u Caldolan Kharmawphlang (39’) hynrei ka Laitkor ka la ïakhun tyngeh ban pynkhihjar lai sien lyngba u Samborwell Mynsong (47’), u Hamingbert Nongbet (56’) bad u Risuk Malngiang (69’).
Baroh arliang ki la wanrah lai tylli ki jingkylla ha ka kynhun ba sdang jong ki. Ka Mylliem ka la sei madan da u Donboklang Nongsteng, u Donboklang Majaw bad u Alem Khongwir ha jaka jong u Shaibor Nongrum, uba la ïoh ïa ka red card ha ka jingïakhun kaba nyngkong, u Kevizakie Ciesotsu bad u Fedrick Wahlang.
Na ka bynta ka Laitkor, u Balajiedlang Lyngwa, u Shelbilkstar Kharshilot bad u Iaryngkatlang Kharkrang ki la sdang ha jaka jong u Samuel Suting, Wadskhem Marbaniang bad u Kitdor Kharphuli.
Kine ki arliang mamla ki la sdang da kaba husiar bha, khlem da sngewphylla namar ba ki la mad ïa ka nam rem ha ki jingïalehkai ba nyngkong jong ki. Ka Mylliem ka la shah rem salit da 1-0 ha ka Nongkseh, katba ka Laitkor ka la rem kput haduh 5-0 ha ka Mawlai.
Ha ka jingïakhun ka Laitkor, ka la ïoh ïa ka kabu kaba paka ban lamkhmat na ka penalty, pynban u Risuk u la pynsyrwa kai ïa kane ka kabu da kaba shut sha lait.
Ka kol ba nyngkong ka la wan lyngba ka Mylliem, kaba la urlong da ka jingtrei shitom u Remark Kharmalki, uba la pynkiar shuwa na ki katto katne ki rangap-dien jong ka Laitkor shuwa ban pashat ïa ka bol sha u Caldolan ban thep suk sha kol.
Tang 2 minit ha ka kylla miet ka Laitkor ka la ïohlad ban pynïakhaid lyngba u Samborwell, shuwa ba u Hamingbert bad u Risuk kin bynrap sa ar tylli ki kol ha ka minit kaba 56 bad 69 ban pynthikna ïa ka jingjop.
Na ka bynta ki jingïakhun ban wan jong ka SPL 2026 yn sa pynbna pat kham hadien da ka Shillong Sports Association, da kaba pynshong nongrim ïa ka jingïashim bynta jong ki lai tylli ki klob SPL- ka Shillong Lajong, Nongkseh bad ka Langsning ha ka lympung Durand Cup 2026 kaba dang ïaid shakhmat. Baroh lai tylli ki don ha ka Group E.
