Kem ki briew ka Wild Life 4 ngut ki nongkhïii beaiñ kurup bniat hati bad snieh kyrbei

Shillong, Nailar 4 : Ka Tnad Wildlife ka la ïoh ban kem ïa 4 ngut ki briew bad kurup ïa ki bniat hati lem bad ki snieh kyrbei ha ki artylli ki jingkhynra ba la pynlong ha Ri-Bhoi District. ïa kane ka jingkhynra la pynlong da ka Nongpoh Wildlife Range, Khasi Hills Wildlife Division, kaba la pynshong nongrim kat kum ki jingïoh khubor ba thikna.
ïa ka jingkhynra ba nyngkong la pynlong ha ka 18 tarik Naitung ha surok Umwang, hadien ka jingïoh khubor na ka Wildlife Crime Control Bureau ïa ka jingdon ka kam khaïi tuh hapoh ka surok Nongpoh-Umden.
Ki nongtrei ka Wildlife ki la ïoh kem ïa arngut ki briew bad ki la ïoh kurup ia 4 tylli ki bniat hati ïa kaba la ngeit ba dei jong ki Hati Asiatic.
Kine ki arngut ki kyrteng u Tras Khymdeit bad u Wilshon Khymdeit ba na Ri-Bhoi. ïa kine ki arngut la register case hapoh ka Wild Life (Protection) Act, 1972 bad ka jingtohkit mynta kala ïaid shakhmat.
Kawei pat ka jingkhynra ka la jia ha ka 2 tarik Nailar hapoh ka shnong Shakhoikuna. Ka kynhun kala bat ïa laingut ki suba bad kurup ïa artylli ki pla kiba don ïa ki snieh ba suba dei jong ki Kyrbei.
Arngut ba la tip kyrteng u Benedict Khymdeit na Ri-Bhoi bad u Rupai Ingti ba na Kamrup, Assam lah kem noh da ka kynhun katba uwei ula lait ban phet. ïa kine ki mar la kurup noh hapoh ka Wildlife Act bad la register case pyrshah ïa ki.
Ki Heh ka Wildlife ki pyntip ba ki hati bad ki kyrbei ki dei kiba don ha ka thup jong ki mrad kiba la ai jingïada bha hapoh India bad ka jingkhaïi ïa ki dkhot met jong ki, ka buh ha ka jingma ïa ka jingduh jait jong ki.