Sohra, Nailar 3: Ka Ophis jong u Sub-Divisional Magistrate, Sohra Civil Sub-Division, ka la pyntip ba la pynmih ïa ka hukum ba khang pyrshah katkum ka kyndon 163 jong ka Bharatiya Nagarik Suraksha Sanhita (BNSS), 2023, kaba treikam mardor ban khang ban shet jingshet bad ban pyndonkam ïa ki ding ha ki jaka paidbah hapoh u pud u sam jong ka Sohra Civil Sub- Division.
Ïa kane ka hukum la pynmih hadien ba la mih khubor ba ki nong jngohkai pyrthei bad ki nongwan kai ki la shet jingbam ha ki rud surok, ki lay-by, ki jaka peitkai, ki jaka ba lait bad kiwei kiwei ki jaka bym shym la buh kyrpang, khamtam ha shi lynter ka surok Shillong-Sohra-Shella bad kiwei kiwei ki surok hapoh ka Sohra Civil Sub-Division.
La iohi ba kum kine ki kam ki la pynlong ïa ka jingbret khlem da pyrkhat ïa ki jaboh jabaiñ, ki plastic, ki bilor, ki pliang ba lah ban pyndonkam tang shisien, ki tiar song bad kiwei kiwei ki jaboh jabaiñ, kaba wanrah ïa ka jingpynjot ïa ka mariang, kaba pynmih jingeh ïa ki paidbah, kaba khring ïa ki mrad, kaba khanglad ïa ka jingïaid laitluid jong ki kali bad ka jingpynjot ïa ki jingitynnad ka thain.
Ka bor synshar ka la kdew shuh shuh ba ka jingpyndonkam ïa ki tyndong LPG, ki tyndong shet umphiang sharak, ki dieng thang bad kiwei kiwei ki ding ba plie ha kum kine ki jaka ka buh jingma kaba khraw ïa ka jingpluh ba shu jia ryngkhat bad ka jingpluh khlaw, da kaba buh jingma ïa ki khlaw ki btap, ki jingthung jingtep, ki mar ki mata paidbah, ka jingim briew bad ka mariang.
Katkum kane, ka hukum ka khang ïa kino kino ki briew ne ki kynhun briew ban shet jingshet, pynkhreh jingbam, pynmeh ïa kano kano ka ding, ne pyndonkam ïa ki tyndong LPG, ki stove, barbecue grills, ki dieng thang, ki jaka shet jingshet ne kino kino ki tiar shet jingshet ne ki tiar pynkhluid ha kano kano ka rud surok, ki jaka ieng kali, la- hapoh u pud u sam jong ka Sohra Civil Sub-Division.Kane ka jingkhang kan treikam ha ka surok Shillong-Sohra-Shella bad ha baroh kiwei pat ki surok paidbah bad ki jaka paidbah hapoh ka Sub-Division.
Ka hukum, pynban, kan ym treikam ha ki jaka picnic ne ki jaka ba la buh kyrpang ba la pynbna ne mynjur kyrpang da ka bor ba dei peit ne ka Dorbar Shnong ba dei peit, ha kaba la shah ban shet jingshet bad ki jaka bret jaboh kiba biang bad ki jingpynbeit ban iada na ka jingpluh.
La bthah ruh ïa ki paidbah ba kim dei ban bret pathar ïa ki jaboh jabaiñ, ki plastic, ki bilor, ki tiar ba pyndonkam tang shisien, ki tiar thep ne kino kino ki jaboh jabaiñ ha ki jaka paidbah. Baroh ki jaboh kiba mih dei ban weng bad bret tang ha ki jaka lum jaboh ne ki jaka buh jaboh ba la ai bor.
Ka Ophis jong u Sub-Divisional Magistrate ka la pynpaw ba la bthah ïa u Officer-in-Charge of all Police Stations, Executive Magistrates, officers of the Forest Department, Tourism Department, Public Works Department, ki bor synshar shnong bad ki Dorbar Shnong ba dei peit ba kin pynthikna ban pyntreikam da kaba tyngeh ïa ka aiñ.Lada lap ba uno uno u briew u pynkhein ïa ka hukum un shah pynngat ha ki kyndon ain kiba ïadei bad kane.
Kane ka hukum ka la treikam mardor bad kan dang treikam haduh ban da mih kiwei pat ki hukum.
