Halor ka jingïap ka Kong Joit Kharlyngdoh pynlong ka Dorbar Shnong Jakrem da ka ‘Peace Rally

Mawkyrwat, ‘Nailar 03, 2026: Kum ka dak ban pynpaw ïa ka jingsngewsih kaba jur bad ban pynrem ïa ka jingshah pynïap jong ka Kong Joit Kharlyngdoh, kaba 76 snem ka karta na shnong Jakrem, South West Khasi Hills District, ka Dorbar Shnong Jakrem mynta ka sngi ka la pynlong ïa ka Peace Rally.
Ïa kane ka Peace Rally la sdang na Ïew Mawleiñ sha Mawrangkynda bad la pynkut ha Madan Pyndenkseh, ha kaba ki paidbah nongshong shnong ryngkat bad ki nongïalam shnong ki la ïashimbynta shitrhem ban pynpaw ïa ka jingpyrshah ïa kane ka kam runar.
Ha ka jingïaid paidbah, ki nongïashimbynta ki la pyrta ban pynrem ïa ka jingshah pynïap jong ka Kong Joit Kharlyngdoh bad ki la kyrpad ïa ki bor ba dei peit ba kin pynkloi ïa ka jingtohkit khnang ba kiba donkti ha kane ka kam kin shah kem bad ïoh ïa ka jingbishar kaba hok katkum ka aiñ.
Ha kajuh ka por, ka Dorbar Shnong Jakrem lyngba u bah Pascal Wahlang uba dei u Myntri Shnong u la kyntu ïa ki paidbah ban ïai bteng ban ïatreilang, ban pynneh ïa ka jingïalong kawei, ka jingïasuk bad ka jingïaishah para briew, khnang ban wanrah ïa ka jingshongsuk shongshngaiñ hapoh ka shnong bad ban rat dyngkhong ïa kino kino ki kam sniew kiba lah ban pynthut ïa ka shongsuk shongsaiñ.
Lah ban kdew ba ka Kong Joit Kharlyngdoh ka la jah na ïing naduh ka 4 tarik u Naitung, 2026, ha ka por kumba 6 baje janmiet. Hadien ka jingwad kaba bun sngi, la lap ïa ka metïap jong ka ha ka 20 tarik u Naitung, 2026, kumba ha ka por 2 baje nohphai sngi, ha kawei ka jaka khlaw kaba la tip kum ka Pungkse, kaba hap hapoh u pud u sam jong ka shnong Jakrem.