Shillong, Nailar 03 : Ka dei ka sien kaba nyngkong eh ba ki khynnah pule ka St. Peter’s Secondary School, Mawpat, Shillong kiba leit mihkhmat ïa ka skul ha ka Inter school East Khasi Hills District Judo Championship 2026 ban ïoh khur haduh 7 tylli ki takma, kata lai tylli ki takma ksiar, kawei ka takma rupa bad lai tylli ki takma rnong.
Ha ka lympung ïalehkai ba la pynhap pyrda ha ka 01tarik Nailar da ka East Khasi Hills Judo Association ki khynnah skul jong ka St. Peters kiba ïoh khur takma ksiar ki long u Jesteen Marak, ka Ebina Kharkrang bad u Raphael Terren Warjri. Katba ka Lawanda Shisha Kharkongor ka la ïoh khur ïa ka takma rupa bad lai ngut kiwei pat kiba la ïoh khur ïa ka takma rnong ki long ka Amity Nongrum, u Raphael Marwein bad u Jesteen Marak.
Kum ka jingsngewnguh bad ka jingai mynsiem ïa ka jingwanrah burom jong kine ki khynnah, ki bor pynïaid jong ka skul ki la pynkup burom ha ka jingïalang kaba la long ha ka 03 tarik Nailar, 2026 da u Principal u Fr. John Paul Lyngdoh ryngkat ka jingsakhi lang ki nonghikai, ki khynnah skul bad u Head Coach u Bah Balamphrang Kharkongkor.
Ha kane ka sngi, ka skul ka la pynkup burom ruh ïa u Hamedamanbha Kharkongor u khynnah skul uba la ïoh ïa ka nam Best Player ha ka lympung ïalehkai Basketball North East Championship ba la pynlong da ka Salesian Youth Movement.
