Ïa ka jingshah kem u nongïalam ka JNC ha shwa ka Jingpyngsngew Paidbah & Kynthoh jur ka MPUF ïa ka jingleh ka sorkar

Khliehriat nailar 02: U President jong ka Meghalaya People’s United Front, East Jaiñtia Hills District,u bah Kyrshan Blah, haba kren sha ki pathai khubor mynta ka sngi, u la pynpaw ka jingsngew khia bad sngew bitar ïa ka jingleh donbor ka sorkar jylla ba la lam khmat da ka party NPP, namar ka jingshah kem u President jong ka Jaiñtia National Council (JNC), u bah Sambormi Lyngdoh lem bad ki dkhot ha ka por ba ki leit ban pyrshah ïa ka public hearing jong ka company Shree Cement, ka jingshah kem u nongialam ka JNC ka la jia shi sngi shwa ban pynlong ïa ka public hearing kata myn ha ka 30 tarik u bnai naitung 2026.
U bah Kyrshan Blah la kynthoh jur ruh ïa ka jingleh ka sorkar da kaba ong ba “Lada wan ki company hapoh ka jylla ka jingioh jingmyntoi ka long ïa ka sorkar ym dei ia ki paidbah namar ka sorkar ruh ka lah ban pyndonkam da ki company ha kano kano ka por khamtam ha ka por election bad ka sorkar ruh katba ong ki company ka ngeit beit, ngi kum ka seng ngi pynrem jur ïa ka sorkar bad ka jingleh ka sorkar ka pynduh jingkyrmen, pyntieng pyn smiej ïa ngi ki sengbhalang, tangba ngi kum ki sengbhalang ngim dei ban tieng, ngim dei ban duh bor hynrei dei ban tur beit shakhmat”
U la ai ruh ka jingiaroh ïa ka jingtreikam ka Jaiñtia National Council da kaba ong ba ka JNC ka la trei bun tylli ki mat na ka bynta ki paidbah bad ka tur shakhmat bad myn ha kine ki sngi ruh shwa ban long ka public hearing ki pulit ki la kem noh ïa ki nongialam jong ka Jaiñtia National Council bad kynnoh ba ka jingkem ïa ki nongialam ka JNC ka dei namar ba ka sorkar ka la tieng ioh ba kan pulom ka public hearing, u bah Kyrshan Blah u la bynrap da kaba ong ba “Kane ka jingshah kem ki nongialam ka dei kaba ngim lah ban pdiang da lei lei ruh, kane ka sorkar ka la leh bor shaba palat khamtam ïa ngi ki sengbhalang, nga ong ba ngi kum ki sengbhalang ngim dei ban tieng, ngim dei ban duh jingkyrmen, ngi dei ban tur shakhmat, ngin ialeh ïa kane ka sorkar, ngin pynduh jait syndon ïa kane ka sorkar”
“Ngi na ka liang ka seng ngim don eiei ban kynthoh ïa ki pulit namar ka bor baroh ka shong ha ka sorkar bad katba ka sorkar ka hukum lyngba u myntri rangbah ka jylla, ki symbud myntri rangbah ki pulit bapli ki hap ban leh namar lada kim leh ruh ki pulit kin shu shah pynkynriah jaka trei kai na kawei ka district sha kawei ka district, te na kata ka daw ki pulit bapli ki hap ban kem kumba hukum ka sorkar bad ka sorkar ruh katba ong ki company ka ngeit beit, ngi kum ki sengbhalang bad lada peit kum ka Jaiñtia National Council ruh ka la buh bun tylli ki jingujor sha kiba halor ruh ka sorkar kam sngap, ki la pynlong da ka jingiakhih ruh ka sorkar kam sngap, nga da pynrem jur ïa kane ka sorkar” la bynrap shuh shuh u nongialam ka MPUF na East Jaiñtia Hills District.
Ha kajuh ka por, ka MPUF East Jaiñtia Hills District, ka byrngem jur ïa kane ka sorkar ba kynthup u myntri rangbah ka jylla lem bad ki ar ngut ki symbud myntri rangbah da kaba ong ba “Kynmaw bha ba ynda la bitar u paidbah un sa bret ïa phi namar dei ki paidbah kiba pynshong ïa phi ha kato ka shuki, ngi ki paidbah kiba ai vote ïa phi bad pynshong ïa phi ha shuki, ngi la jied ba phin iasaid na ka bynta ki paidbah hapoh Assembly, kane ka sorkar ba mynta kam ju sngap shuh ïa ka sur jong ki paidbah, ngin sa ïa peit ha u snem 2028 mano ba pynjo ïa ki, hato pynjop kita kiba don ha ka bor ne pynjop ma ngi kiba ri ba ria, ngin sa peit, mynta ngim lah ban ong eiei namar phi dang don ha ka bor hynrei ynda la meh ka ding phin nym lah ban pynlip ïa ka ding ba klang hapoh ka district jong ngi, ngi sngewsih ba shah kem u nongialam sengbhalang namar ngi baroh ki sengbhalang ngi long kum shipara, ngi iatrei lang ha kano kano ka mat, ngi kyrshan lang beit uwei ia uwei, nga kwah ban ong balei shah kem ki nongialam kiba leit ban ïa ieng lang bad iasaid na ka bynta ka hok jong ki paidbah, ngi ki sengbhalang ngim dei ki lehnoh, ngim don ki tiar ki tar, hynrei ngi thaw ïa ki sengbhalang ban ngin peit lem ïa ki kup shiliang, sem shiliang ha ka imlang ka sahlang, tang kawei ngan ong ka NPP kan sa jah ha u 2028”