ïashimbynta u Lat ha ka jingpyllait paidbah u PM ïa ka jingsdang ïa ka thma pyrshah ïa u Drok ha ka ri India
Shillong, Nailar 02: U Lat ka Jylla Meghalaya CH Vijayashankar ha ka sngi u Blei, u la ïashim bynta ha ka jingplie paidbah jong u Myntri Rangbah duh ka ri u Narendra Modi lyngba kor Digital ïa ka jingiakhun thma pyrshah ïa u drok hapoh ka ri India ne ka Nasha Mukt Yuva for Viksit Bharat–Sankalp Abhiyan ha Lok Bhavan Shillong.
U Myntri Rangbah duh ka Ri u Narendra Modi u la ai jingkren ha kane ka jingïalap ha baroh kawei ka ri.
Ïa kane ka prokram la pynlong ha kajuh ka por ha ki 28,000 tylli ki jaka ha kylleng ka ri India, ha kaba palat 1 klur ngut ki samla ka ri ki la ïashim bynta lyngba Online.
U Myntri Sorkar Pdeng u Mansukh Mandaviya ula kren halor ka jingdonkam ban don bynta lang ki samla ban ïakhun pyrshah ïa ka jingdih pynbuaid khamtam eh ïa u drok.
Ha Shillong, ki samla pule bad ki nonghikai na NEHU, IIM Shillong, MLCU bad kiwei kiwei ki jaka pule, nalor ki dkhot jong ki seng niam ki la wan ban ïashim bynta ha kane ka sngi haka jingdonlang u Additional Chief Secretary u HC Chaudhary.
Hadien ka jingkren jong u Myntri Rangbahduh, baroh ki nongïashim bynta ha Lok Bhavan, kynthup ïa u Lat, ki la shim ïa ka jingbam smai bad jingkular Nasha Mukt Bharat Abhiyan.Ki la pynskhem biang ïa ka jingkular jong ki ban ïakhun pyrshah ia ka jingdih pyn buaid bad ban kyntiew ïa ka rukom im kaba koit ba khiah, kaba don ka jingkitkhlieh bad kaba lait na ka jingdih pynbuaid.
La pynkut ïa ka prokram da ki Street Play da ki nongjop ha ka State Level jong ka Nasha Mukti competition. Ki Street Play, ki pynleit jingmut ha ka jingma kaba mih na ka jingdih drok bad ki Street Play ki la ïawer ruh ïa ka jingïatreilang jong ki longïing, ki jaka pule, ki shnong ki thaw bad ki tnat Sorkar ban pynsngewthuh ïa ki paidbah.
La pynkut ïa kane ka jingïalang da ka jingkut jingmut kaba thymmai hapdeng ki nongïashim bynta ban noh synñiang sha ka jingthmu jong ka ri India kaba lait na ki jingdih buaid bad ban trei na ka bynta ka lawei kaba koit ba khiah bad kaba shngaiñ na ka bynta ki samla ka Meghalaya bad ka Ri.