12 tarik Nailar yn pdiang ka Shillong ïa u Marcin u nongtem Guitar ba pawnam ka pyrthei
Shillong, Nailar 02: Ka nongbah Shillong kan sa pdiang ïa uwei na ki nongtem guitar ba pawnam tam ha ka pyrthei, u Marcin, uba dei u nongtem guitar, nongthoh jingrwai bad producer na Poland, ha ka tamasa kaban pynlong ha Lariti Performing Centre, Mawkasiang, Shillong ha ka 12 tarik Nailar, 2026, kum shi bynta jong ka Marcin – Art of Guitar Tour 2026.
Ïa kane ka concert la pdiang sngewbha da ka Sorkar Meghalaya bad la pynïaid da Jameson Connects, ka rynsan paidbah jong ka Jameson Ginger Ale, ryngkat bad Foreword Lifestyle and Experiences LLP. Kane ka tamasa ka long ka kabu kaba kyrpang ïa ka jylla Meghalaya ban pdiang ïa uwei na ki nongtem guitar ba la ithuh paidbah ha ka pyrthei.
U Marcin u la pawnam namar ka sap tem guitar jong u kaba kyrpang, da kaba pynïasoh ïa ka fingerstyle, ka percussion, ki sur orchestra bad ki buit thymmai ha ka jingtem.
Ka India ka dei ruh ka ri kaba saw ha ka pyrthei ha kaba bun tam ki paidbah ki peit bad ieit ïa ki jingtem jong u, watla kane kan dei ka sien kaba nyngkong eh ba un wan pynlong concert ha India.
Haba kren shaphang ka jingïaid lynti jong u sha India, u Marcin u la ong ba u la sngewkmen bha ïa ka jingieit bad jingkyrshan kaba u ïoh na ki paidbah India lyngba ki khubor bad ki jingai jingïaroh, bad u khmih lynti ban ïakynduh markhmat bad ki paidbah ha kane ka jingïalang tem.
Ka jingwan jong u Marcin ka la pynkmen ruh ïa ki nongtem ha Meghalaya. U L.B. King, uba dei u nongrwai ba ïatreilang bad ka Chief Minister’s Meghalaya Grassroots Music Program (CM-MGMP), u la ong ba kane ka concert ka dei kaba ym dei ban duh da kino kino kiba ieit guitar.
Ka Hannah, kaba dei ruh ka dkhot jong ka CM-MGMP, ka la pynpaw ïa ka jingsngewkmen jong ka, da kaba ong ba kam ju mutdur ba yn don ka lad ban ïohi ïa u Marcin ba un wan pynlong concert ha Shillong.
Shuwa ka concert, yn pynlong ruh ïa ki prokram jingïakynduh ha ki kolej, ka jingai jingïarap ticket ïa ki samla pule bad ki jingpynshlur paidbah lyngba ka put ka tem, ban khring ïa ki samla bad ki nongieit jingrwai.
Da ka nam jong ka Shillong kum ka nongbah ba pawnam ha ka put ka tem, la khmih lynti ba kane ka concert kan nang pynkhlaiñ shuh shuh ïa ka jylla Meghalaya kum kawei na ki jaka ba kongsan tam ha ka ri India ha ka liang ka put ka tem.