Shillong Nailar 02: U Khlur Aktor ka Bollywood u John Abraham hynnin ka sngi Thohdieng, ula ong, ba ka Thaiñ Shatei Lammihngi ka don ïa ka kabu kaba biang tam ban pynmih ïa ki nongïalehkai phutbol kiba tbit ha ka pyrthei bad ula pynbna ba kane ka Football Academy kaba thymmai ha ka thaiñ kan sdang treikam ha kine ki 2 snem kiban wan.
Haba kren ha ka jingïalang pynsngewthuh paidbah ban pyrshah ïa u droks halor ka phang “Pulse of the Hills: Every Beat Against Drugs” kaba la pynlong da ka Sorkar Meghalaya ryngkat ka jingïatreilang bad ka Drug Reduction Elimination & Action Mission (DREAM), u John Abraham ula ong, ba u ïohi ïa kane ka thaiñ kum ka lawei jong ka phutbol ha ka ri.
Da kaba ong, ba ka thaiñ shatei lammihngi ka dei ka jaka kaba ka phutbol ka pawnam bha, u Abraham ula ong, “Nga kwah ban ïohi ïa u Ronaldo ne ïa u Messi ban mih na ka thaiñ Northeast”.
Ula bynrap ba kane ka Football Academy ka ban sa wan ka dei shi bynta jongka jingïohi jngai ban saiñdur bad ban ai jinghikai ïa ki nongïalehkai kiba dang khynnah kiba na kane ka thaiñ.
Haba ïakren bad ki khynnah pule ha State Guest House, Taraghar, u Abraham ula kren ïa ka jingdonkam ban kiar ïa ki jingmlien kiba sniew bad ki jingdih kiba sniew.
Ula ïalap ban long kiba don akor bad ban long kiba ryntih, ban im ïa ka jingim kaba lait na kino kino ki jingdih kiba sniew kaba don ïa ka tynrai jong ka jinglong kaba khlaiñ bad ula kyntu ïa ki samla ba kin pyndonkam ïa ka bor ka jongki ha ki kam ïalehkai.
Ula pynpaw ruh ka jingsngewnguh ïa u Myntri Rangbah ka Jylla u Conrad K Sangma, da kaba ong “Ba u long uwei na ki briew kiba bha ” bad kren ruh ïa ka jingdon ka jongu ïa ka jingieid na ka bynta ka Shillong bad ka Northeast baroh kawei.
Katba u Nongaibuit jong ka Tnad Social Welfare u Bah Paul Lyngdoh, uba la long kum u Kongsan ula kren halor ki jingbei tyngka ïa ki kam pynroi kiba dang ïaid shakhmat na ka bynta ki samla bad ïa ki jingtei ha ki kam ïalehkai, kaba kynthup ïa ka Academy bad ïa ka Stadium kaba ula ong, ba kan dei ka Stadium kaba heh tam ha ka ri kan don ha Shillong.
“Ka thaiñ ka kan ïoh ïa ka lawei kaba phyrnai khambha ban ïa ka sngi” ula ong. Kane ka prokram ka la pynleit jingmut ha ka ban kiar, ban ïoh ïa ka jingkoit jingkhiah bad ka jingdon bynta lang ka imlang sahlang hapoh jong ka DREAM Mission, kaba la sdang ha u snem 2022.
Ha kane ka jingïalang, la pyllait paitbah ïa kawei ka kali ka ban ai jingshakri kyrpang ïa ka Asha Bhavan Rehab Centre ha Tura ban pynkhlaiñ ïa ka jingpyrshang ka jylla ban pynduna ïa u drok bad ban ai jingsumar.
U Abraham ula pynkup burom ïa kito kiba la lah ban iehnoh ïa ki jingdih kiba sniew bad ban ïoh ïa ka jingkoit jingkhiah bad ïa uba dang khynnah tam ban ïoh noh ïa ka jingkoit jingkhiah.
Katba ka Saloni Verma ka Director ka Tnad Social Welfare ka la ong, ba ka prokram ka long kum ka jingïeng tylli ka sorkar pyrshah ïa ki jingdih kiba sniew.
Ka la pynshlur ïa ki samla ban bud ïa ki nuksa jong u John Abraham uba la ïengskhem ban don ïa ka met kaba koit ba khiah bad ban long uba ryntih bad ka bynrap “Ba ka jingjop kaba shisha ka dei kaba shong eh ha ka ban tei ïa ka met bad ïa ka bor pyrkhat kaba khlaiñ”.
Ha kane ka jingïalang la ïoh ruh ïa ka jingphla na kito kiba la jop ïa ka jingïakhun pyrshah bad kiba la ïoh ïa ka koit ka khiah bad Youth Icon. U Marvin B. Warjri uba long u Recovery Champion 2026 na ka Meghalaya Users’ Forum, uba la sam ïa ka khubor halor ka jingïaid lynti ka jongu ha ka jingim shimet ka jongu ha ka “The Choice That Changed Everything.”
