Leh donbor bad pyni bor ka Shree Cement wat ïa kiba pang ba shitom kim pyrkhat shuh kynnoh ka MIWC

Shillong, Naitung 31: Ka Meghalaya Indeginous Women’s Council (M.I.W.C) ha ka kyrwoh khubor ka la pynrem jur halor ka jingleh donbor bad pyn i bor jong ka Shree cement wat ïa kiba pang ba shitom kim pyrkhat shuh ba haduh ba ki lah pynjulor ïa ka surok tang na ka bynta ban khang lynti ïa ki nong pyrshah ban poi sha katei ka public hearing kaba pynlong mynta ka sngi ka 31/07/2026.
Na ka liang ka seng ka la buh ka jingkylli da kaba ong, “Kaei ka daw kaba pynlong ïa ka Meghalaya State Pollution Control Board ban pynlong ïa ka public hearing ne ka jingbishar paidbah kaba dang step ha ka por 8:30. Kaei kaba pynlong ïa ka tnat pulit ban phah ïaid kjat ïa ki nongpyrshah jong ka Shree cement naduh ka shnong Shnongrim shaduh sha ka jaka pynlong ïa ka public hearing.”
Shuh shuh ka MIWC ka la buh ruh ka jingkylli da kaba ong, “Balei ym shym la ai lad ïa ki nongpyrshah kiba shah ktah ban ïa shim bynta ha ka Public hearing jong ka Shree cement plant. Balei ki bor pulit ki hap siat tear gas ha ïew khlem da pyrkhat shuh ïa ki nongleit nong wan.
Ka seng ka la pynpaw bad kynthoh ba ka video ba lah pynmih da kawei na ki lad pathai khubor kaba ong ba ka ïaid beit ïaid ryntih ka public hearing ka Shree cement ka dei kaba bakla namar ym shym la ai lad ïa ki nong pyrshah ne kiba shah ktah ban shim bynta ne poi sha ka jaka pynlong public hearing da ki bor pulit bad ki goons jong ka Shree cement.
“Mano ba ai bor ïa ka Shree cement ban pynjulor ïa ka surok PWD bad ban khanglad ïa ki nongpyrshah ban ïa shim bynta ha katei ka public hearing. Balei hap khang lynti ïa ka longkmie ba suh khun tang ban pynurlong ïa ka jingthmu jong ka Shree cement. Balei ka sorkar kam ai lad ïa kito ki trai jaka kiba shah leh donbor ha ka Shree cement halor ka hok jong ki ban pynbeit ïa ki kynrum kynram,” ong ka seng.