Mihkhmat ka samla na ri lum Garo ïa ka India sha ka Commonwealth Youth Parliament ha Australia

Shillong, Naitung 31 : Ka samla pule na ri lum Garo ka Nandini Ishvi O Sangma kaba shim ïa ka subjek Political Science ha Don Bosco College, Tura ka la leit ban mihkhmat ïa ka ri India sha ka Commonwealth Youth Parliament kaba Khatlai kaba long ha Sydney, Australia.
Ha kane ka jingleit mihkhmat ka la ai ar tylli ki jingkren shaphang ka jylla Meghalaya kumno la ithuh kyrpang ïa ka, ka jingïalong mar ïa ryngkat lang, ka synshar paidbah bad ka jingpyndonkam ïa ki kor teknoloji. ïa kane ka jingkren ka la ai hakhmat ki spah spah ngut ki delegates kiba wan na baroh ki ri Commonwealth .
Ka la ai jingkren halor ka jinglong kyrpang jongka jylla ha kaba ai jait sha ka kmie, shaphang ki jingkieng jri, ka kyrdan jong kawei na ki jaka ba jur slap tam ha pyrthei bad la tip ruh ïa ka kum ka “Rock Capital of India”.
Halor ka jingai jaitkmie ka Sangma la pynshai ba ïa ka jait la ai sha ka kmie bad ïa ki hok ki pot la hiar pateng sha ka khun khatduh tangba kane kam mut ba ka kynthei ka long halor ïa u shynrang. Ka la batai ba ka dei ka rukom ban pynwandur bha ïa ka imlang ka sahlang.
Haba kren pat ïa ka bynta jong ki kynthei ha ka pyrthei baroh kawei ka la buh jingkylli balei ha kiba bun ki bynta jongka pyrthei ki kynthei ki dang ïaksaid beit ban ïoh ïa kata ka jingithuh mar ïa ryngkat lang tad haduh une u snem 2026.
Ka la ai nuksa ïa ka jingbym pynnang pynstad ïa ki kynthei bad pyndonkam jubor ïa ki ha ki kam thombor bad ka khot bad ïawer namar kata ban don ka jingïasngew para briew bad jingsngew ïaryngkat kyrdan lang kumjuh.
Haba kren shaphang ka Artificial Intelligence bad Democratic Integrity Bill 2026 ka Sangma ka la ong ba donkam ban pyndonkam hok ïa ka AI ban pynkhlaiñ ïa ka synshar paidbah.