Ki Samla pule kim dei ban sahkut tang ha ki kamra klas hynrei na ka bynta ki jingsaiñdur thymmai: Anil Kariwala

Shillong, Naitung 30: Ka National Institute of Fashion Technology (NIFT), Shillong ka la sdang ïa ka Orientation Programme kaba lai sngi, kaba pdiang sngewbha ïa ka kynhun ba thymmai jong ki samla pule na kylleng ka ri katba ki sdang ïa ka jingpule jong ki ha kawei na ki jaka pule ba bha tam jong ka India na ka bynta ka jingsaiñdur, ka jingpynïaid ïa ki kam bad ka teknoloji.
Ka jingïalang plie ka long ka dak jong ka jingsdang ïa ka bynta ba thymmai na ka bynta ki samla pule kiba mihkhmat ïa ki kolshor, ki ktien bad ki thaiñ bapher bapher jong ka India. Ïa ka Orientation Prokram la saiñdur khnang ban pynsngewthuh ïa ki samla pule kiba dang shu rung thymmai shaphang ki rukom ai jinghikai ha ka NIFT, ka rukom ai jinghikai kaba bun ka jingsaiñdur, ki nongrim jong ka jaka pule bad ki lad ki lynti kiba ki lah ban ïoh katba ki pynkhreh ban trei ha ka kam saiñdur.
Ïa kane ka jingïalang la plie da u Anil Kariwala, Nongseng & CEO, Kariwala Industries Ltd., kum u Kongsan, bad u Dr Ravi Shankar Bhakat, Nonghikai jong ka Marketing, Indian Institute of Management (IIM) Shillong, kum u Symbud Kongsan.
Ha ka jingai jingkren jong u, u Anil Kariwala u la pynshlur ïa ki samla pule ban ym sahkut tang ha ka kamra pule bad ban pynkhreh ïalade na ka bynta ki jingdonkam kiba nang kylla jong ka kam saiñdur ïa ki jaiñ bad ka kam ba ïadei bad ki jaiñ ha ka pyrthei.
Da kaba shim nuksa na ka jingshemphang jong u ha kaba ïalam ïa ka kam kaba bun bynta kaba ngeit skhem ha ka jingpynmih mar kaba don ka jingbahkhlieh, ka jingïaineh bad kaba peit bniah ïa ka jingbha, u la ban jur ïa ka jingdonkam ban pynïasoh ïa ka kam saiñdur bad ka jingtbit ha ka teknoloji, ka jingseisoh, ka jinglong ryntih ka ka kam bad ka rukom treikam kaba khlaiñ.
U la kyntu ïa ki samla pule ba kin long kiba thrang ïa ka jingnang jingstad, ban pdiang ïa ki kor ki teknoloji kiba dang mih, ban sngewthuh ïa ki jingkylla jong ka ïew ka hat bad ban ïai bteng ban kyntiew ïa ki sap jong ki khnang ba kin long kiba kiew shaphrang ha ka kam kaba bun ki jingïakhun.
U Kariwala u la pynshlur ruh ïa ki samla pule ba kin long kiba sngewthuh ïalade katba ki dang ïai bteng ïa ka jingtbit ha ki kam ba ki la jied. Da kaba ban jur ïa ka jingdonkam jong ka jingsaiñdur thymmai, ka jingïaineh bad ka jingïatreilang, u la kyntu ïa ki ban iar ka jingmut jingpyrkhat katba ki dang ïaineh ha ka pateng kolshor ba riewspah jong ka India. U la ban jur ba ka kam saiñdur ka sdang da ka jingsngewthuh kaba jylliew ïa ki briew, ka jingthmu bad ka jingkitkhlieh.
U Dr Ravi Shankar Bhakat u la kyntu ïa ki samla pule ba kin ithuh ba ka lawei jong ka kam saiñdur kam sahkut tang ha ka jingitynnad. U la ban jur ïa ka bynta kaba nang kiew jong ki nongpynwandur kum ki nongsaiñdur thymmai, ki nongpynbeit ïa ki jingeh, ki nongseng kam sengjam bad ki nongïalam kiba lah ban wanrah jingkylla ha ki kam, ban pynwandur ïa ka jinglong jong ki nongthied bad ban noh synniang sha ka roi ka par kaba ïaineh.
Haba pdiang sngewbha ïa ki samla pule, u Dr Brijesh Deore, Director ka NIFT Shillong, u la ai khublei ïa ka kynhun ba dang shu pynrung thymmai na ka bynta ka jingïoh rung ha kawei na ki jaka pule ba bha tam jong ka ri. U la pynshlur ïa ki samla pule ban don ha ka jinglong ryntih ha ka jingpule jong ki, ka jingpynwandur bad ka jinglong kaba skhem.
U la ban jur ba ka jingpynwandur ka lah ban long kum ka lad kaba khlaiñ ban wanrah ïa ka jingsaiñdur, ka jingpynneh pynsah ïa ka kolshor, ka jingïaineh bad ka jingkylla kaba bha ha ka imlang sahlang. U la kyntu ïa ki samla pule ban pyndonkam pura ïa ki lad jinghikai jong ka institute, ki jingïatreilang bad ki karkhana bad ka rukom ïoh jinghikai kaba bun bynta katba ki kylla sha ki briew kiba la tbit ha ka kam.
Ha ka sngi ba nyngkong jong ka Orientation Programme la batai ruh ïa ki samla pule shaphang ka rukom ai jinghikai ha ka NIFT Shillong, ki jinghikai kiba bun bynta, ki rukom ai jingkyrshan ïa ki samla pule, ki jingdon jingem ha ka campus bad ki nongrim jong ka jaka pule.