Ha ka World Record buhthong ban pynrung ïa ka tamasa 1000 Drum Wangala Festival mynta ka kynti

By Mawphor Editor On Jul 31, 2026

Shillong, Naitung 30 : Ka Sorkar Meghalaya ka dang pynkhreh ban pynrung ïa ka tamasa 1000 Drums Wangala Festival sha ka Guinness World Records, da kaba thmu ban pynïashim bynta haduh 2,500 ngut ki nongput, ki nongshad bad ki nongrwai, ong u Myntri ka tnad Tourism ka Sorkar Jylla, u Timothy D Shira.
Ha ka jingïakren bad ki lad pathai khubor, u la ong ruh ba ka tamasa kan long beit ha Chibragre, ka jaka ba ju pynlong ïa ka Wangala man la u snem. Katkum ka jingong jong u, ka Wangala Committee ka la ai jingmut ba ka tamasa kam dei ban shah pynkynriah shawei namar kan pynduh ïa ka jinglong tynrai bad ka thong jong ka.
“Ka Wangala Committee ka sngew ba lada pynkynriah ïa ka Wangala shawei, kan duh noh ïa ka jinglong tynrai bad kan ktah ïa ka jingsngew jong ki paidbah. Kumta, ka tamasa kan long beit ha Chibragre, kaba dei ka jaka ba ju pynlong ïa ka Wangala man la u snem,” la ong u Myntri ka tnad.
Shuh shuh u la ong ba watla ka sorkar ka la shim ïa kane ka rai, hynrei ka dang bishar bniah la ka madan ha Chibragre kan lah neem ban pdiang ïa ka jingbun ki paidbah bad ki nongïashim bynta kiba la khmih lynti.
Ban peit ïa kane ka bynta, yn thaw ïa ka committee ba kyrpang hapoh ka jingïalam jong u Deputy Commissioner ka distrik, kaban peit bniah ïa ki jingpynkhreh bad ban ai jingmut halor ka jinglah jong ka jaka ban pynlong ïa ka tamasa.
Haba kren shaphang ka jingthmu ban thaw ïa ka World Record, u Myntri u la ong ba ka jingpynlong ïa ka 1000 Drums Wangala kan long kaba kham heh ban ïa ki snem kiba la leit.
“Mynta ngi thmu ban pynlong da ka 1000 Drums ha ka jaka jong ka 100 Drums. Kane ka mut ba yn don kumba 2,500 ngut ki nongput, ki nongshad bad ki nongrwai kiba ïashim bynta. Ngi dang trei ruh ban pynrung ïa kane ka tamasa sha ka Guinness World Records,” u la bynrap shuh shuh.
U la bynrap ba ka Chibragre, kaba dei kawei na ki jaka ba rim tam ba ju pynlong ïa ka Wangala Festival, ka la dep pynbha ban pynkhreh ïa kane ka jingrakhe kaba la khmih lynti ban khring bun ki nongwan peitkai na kylleng ka ri bad shabar ri.