Ban kyntiew ïa ka kam ri khñiang da ka jingïalang pynlong ka CSB ha shnong Banglapluh

Nongstoiñ, Naitung 30 : Na ka bynta ban kyntiew bad kham pynbha shuh shuh ïa kaq kam ri khñiang kum u khñiang ryndia, khñiang muga, bad khñiang rusom ka Muga ERI Silkworm Seed Organisation Mendipathar North Garo hills kaba hap ha ka jingpeit jong ka jong ka Ministry of Textiles jong ka sorkar pdeng lyngba ka Central Silk Board ha ryngkat ka jingïatreilang bad ka ophis jong ka Dsitrict Horticulture Officer West Khasi hills ha kane ka sngi palei ka 30 tarik Naitung ka la khot ïa ka jingïalang ba kyrpang ïa baroh ki nongri khñiang bad ki nongtrei jong katei ka tnad trei kam ha ka shnong Banglapluh Mawshynrut Block .
Ha katei ka sngi la pynlong ïa ka jingïakynduh lang ha Donbosco Hall jong ka Christking Higher Secondary school ha kaba la pynïaid da ka kong P.Warjri District Horticulture Officer West Khasi hills . Ka jingthumu ba kongsan jong katei ka jingïakynduh lang ka long ban pynsgewthuh bad pynshlur shuh shuh ïaki paitbah nongshong shnong ban phaikhmat sha ka kam ri khñiang . Shuhs huh ka jingïakynduh lang ha katei ka sngi ka long na ka bynta ba ïathir bad ïaphylliew jingmut ryngkat ki nongri khñiang ha kaba ïadei bad ka jingpynkhreh jong ka sorkar pdeng ban kyntiew shuh shuh ïa ka kam ri khñiang lyngba kawei ka thong lane ka Develoment Plan ka Mera Resham Mera Abbhimaan 2.0. (MRMA 2.0)kaba long ruh ka plan kaba thymmai na ka bynta ban kyntiew ïa ki nongri khñiang ha West Khasi hills.
Ha kaba ïadei bad ka jingthmu ban pyntrei kam ïa katei ka Development Plan lyngba ka MRMA 2.0 la ïoh ïa ka jingbati kaba bniah na u M.Majumdar Saiantist C ha rygkat ka jingpyni ïa ki jingbatai lyngba ki slide ha ka dur khih. Ha kajuh ka por la ïoh ïa ka jingkren na u bah Methodius Dkhar MLA ka Mawshynrut uba long ruh u myntri sorkar uba peit ïa ka tnad Food & Civil Supplies bad Labour uba long u kongsan .
Utei u Myntri sorkar haba kren kum u kongsan u la ong ba ka kam ri khñiang ryndia ka dei ka kam kaba myntoi bha ïa ki nongshong shnong namar nalor ba ïa u sop jong utei u khñiang la thir ïa ki ksai na ka bynta ban thaiñ ïa ki jaiñ ryndia kiba dei ki jaiñ kiba lkordor haduh katta katta ha ka Jaitbynriew Khasi pnar namar la ju pyndon kam ïa ki jaiñ ryndia ha ka riam tynrai jong ka jaitbynriew.
U la ong ruh a ym dei tang ki jaiñryndia ba ka jaitbynriew Khasi jong ngi ka ñiewkor hynrei ki jaiñ muga bad jaiñ rusom ba la thir na ki sop jong kitei ki khñiang ki long kiba remdor bha . Ha kajuh ka por la ïoh ruh ïa ka jingkren na u Block Development Officer jong ka Mawshynrut Block uba long u symbud kongsan.U BDO haba ai jingkren ha katei kasngi u la ong ba ki jaka hapoh ka Mawshynrut area ki long kiba biang bha ban ri ïa u khñiang ryndia, muga bad rusom kumta ka don kam ïa ki nongshong shnong ba kin ïa ki jinghikai kiiba bniah kumno ban ri ïa kitei ki jait khñiang bad lada ki la ïoh ïa ki jinghikai kiba biang kan long ka jingkyrkhu ïa ki bad kan kyntiew ruh ïa ka ïoh ka kot bad ka kamai kajih jong ki bad ka thaiñ baroh kawei.
Khatduh eh la ïoh ïa ka jingiaphylliew jingmut hapdeng ki nongri khñiang ha kaba ki la pynpaw ba ka kam ri khñaing ka dei ka kam kaba eh bha hyrei lada trei shitom ka long pat ka kam kaba ïohnong bha. Ha kajuh ka por ki la kyrpad ïa u MLA ka Mawshynrut ba un thaw lad bad pynsgew sha ka sorkar ba kan pynïoh noh kawei ka jaka ai jinghikai ïa ki nongri khñiang ha ka shnong Umsohpieng khanng ba ki paitbah kin ïoh ban leit shah hikai pyntbit ha ka kam ri khñiang.