Pynrem jur ka Synjuk ki Seng Longkmie ka Hima Langrin ïa ka jingkren u bah P.S. Lyngdoh

Mawkyrwat, Naitung 29: Ka Synjuk Ki Seng Longkmie jong ka Hima Langrin mynta ka sngi ka la pynlong ïa ka jingïalang paidbah ha shnong Wahkaji, South West Khasi Hills District, ban pynrem jur ïa ka jingkren jong u Bah P.S. Lyngdoh kaba la mih lyngba ka channel YouTube hadien ka jingïaid paidbah (rally) kaba la long ha ka 22 tarik u ‘Naitung, 2026 sha Khasi Hills Autonomous District Council (KHADC), ban dawa ïa ka KHADC ba kan pynlong noh ïa ka elekshon ban jied Syiem thymmai ha Hima Langrin.
Ki nongïalam jong ka Synjuk Ki Seng Longkmie ka Hima Langrin ba kynthup ïa ka Kong Mercyful Nongphlang, Kong Bluetiful Syiemiong bad Kong Joycy Mershra, haba ki kren ha ki lad pathai khubor, ki la pynpaw ïa ka jingsngewkhia halor ka jingkynnoh jong u Bah P.S. Lyngdoh ba ki longkmie bad ki paidbah kiba la ïashimbynta ha katei ka rally kim dei ki khun shnong ne ki khun hajar jong ka Hima Langrin bad kine ki jingkynnoh ka long kaba pynmong bad ka bym shong nongrim.
Shuh shuh, ki nongïalam ka Synjuk ki la kdew ruh ba ha u snem 2023, u Bah P.S. Lyngdoh hi u la khot bad kyntu ïa ki longkmie bad ki paidbah ban mih paidbah ha ka rally ban dawa ïa ka jingpynhiar shuki ïa u Syiem Nangtei Syiemiong. Kumta, ki la pynpaw ba ka jingkynthoh jong u mynta ka sngi pyrshah ïa ki juh ki paidbah bad ki longkmie ka pyni ïa ka jingïapher bad ka jingbym ïahap sur hapdeng kaei kaba u la leh mynshwa bad kaei kaba u kren mynta.
Ym tangkata ki la kynthoh ruh ba lada u Bah P.S. Lyngdoh u dei shisha u ‘rang samla uba kit ïakhia ka shon jong ka hima, balei pat ka Seng Samla jong ka Hima Langrin ka pait ar liang? Hynrei dei da ka jingïalam bakla jong u hi, kynthoh ka Synjuk. Ha kaba ïa dei bad ka jingshah kynthoh sa jong ki Longkmie, na ka liang jong ki ruh ki la don ïa ka rai ban ïaid shaphrang ban pynrem ïa u namar kam dei hi ruh ka hok ban kheiñ poh ne ñiew poh ïa ki kynthei ne ki longkmie.
Namarkata, ka Synjuk ki Seng Longkmie ka Hima Langrin ka la shim ruh da kawei ka rai ba pyrshah jur ruh ïa ka jingleh jong u bah P.S. Lyngdoh bad buh ruh ka jingong ba hato lada u long shisha uta u samla uba lah ban pynshai ha ngi ki longkmie, un sngewbha ban buh ka por bad jaka ban pynshai, la un wan pynshai hapoh ka hima ne buh ka jaka ba ki longkmie kin wan ïa kynduh bad wat kren tang ha ki social media.
Kumta, ka Synjuk ki Seng Longkmie ka Hima Langrin ka buh ka jingkyrpad na ka bynta ki paidbah jong ka hima ba kim dei ban ngeit ïa une samla namar u dei u nongshet kylla.