Kum u MP u ban don ha ka Liang Synshar ngan bud dien ïa ka ktien Khasi bad ILP : Dr DRL Nonglait

Shillong, Naitung 22 : U Dr DRL Nonglait uba dei u kyrtong ka NPP na ka bynta ka Election MP Lok Sabha shiteng samoi u la ong ba napdeng ki eksamin baroh kiba u la ïaleh kane ka jingïaleh kaba mynta ka dei kaba eh tam namar don haduh 36 tylli ki subjek kaba u thew ba 36 tylli ki Constituency na ka Shillong Parliamentary Constituency u hap ban leit pyndep ka jingleit pynshai bad pynithuh sha ki paidbah bad u kwah ruh ban ïoh distinction pat ruh na baroh ki subjek kaba mut u kwah ban ïoh ka jingkyrshan ba khlaiñ bad tam bun na baroh ki 36 tylli ki constituency. U khmih lynti ba ka 1 Natiang Constituency kan long ka nonglam lynti kumba la sakhi ha ka jingïalang paidbah ha ka miet Sngi Ba Ar ha kaba palat 20 hajar ngut ki paidbah ki la ïapoi ban sakhi bad sngap da lade ïa ka jingpynshai paidbah ki nongïalam bad na u kyrtong ka NPP.
Haba kren ha ka jingïalang u kyrpad jur ïa ki paidbah ba kin jied ïa u kum u MP u ban don ha ka Liang Synshar kata ha ka sorkar NDA ha Delhi khnang ba un ïoh ban bud dien ïa ki kam kiba sahteng naduh ka jingpynrung ïa ka Ktien Khasi ha ka Khyrnit ba Phra, ka ILP bad kiwei kiwei.
U la pynshai ba ka jingpdiang jongu ban long kum u kyrtong ka NPP kam dei ba un ïoh jingmyntoi shimet hynrei ban ïoh trei bad shakri hok ïa ki paidbah. U la ai burom bad jingïaroh ïa ka sorkar MDA namar ka dei ka sorkar kaba trei hok da kaba ñiewtang ïa ki jingkiew ka roi ka par ha kine ki 8 tylli ki snem ba kane ka sorkar ka la synshar.
“ Haba nga phai sha kane ka sorkar nga ïohi da shisha ba ka dei ka sorkar kaba trei bad shakri hok. Ha kine ki 8 snem ba ka sorkar MDA ka la synshar hapoh ka jingïalam jongka NPP nga la ïohi ïa ki jingkylla naduh sor haduh nongkyndong bad nga thikna ba kane ka sorkar kan wan phai biang ha ka bor ha u 2028 bad wat hadien kata ruh namar ki paidbah ki la ïohi ïa ki kam ba ka trei.
“ Ngi donkam ïa ka sorkar kaba skhem naduh ka jylla haduh ka sorkar pdeng bad kine ar kata ka sorkar MDA bad ka sorkar NDA ki dei ki sorkar kiba skhem kiba ym don ba lah ban pynkhyllem kumta nga kyrpad ïa phi ki paidbah ruh ban jied ïa nga ba ngan ïoh ban ïadon bynta bad ka sorkar pdeng ban ïoh bud dien ïa ki kam kiba dang sahteng namar da kaba don ha ka Liang Synshar lah ban bud dien bad ïakren bad kiwei ki Myntri ba kin wanrah ïa ki Bill na ka bynta ka Ktien Khasi bad ILP ruh ym ban don ha ka Liang Pyrshah ban wanrah da ki Private Member Bill kiba tang shu ïeng pyrshah ka Liang Synshar la rem lypa hynrei lada wanrah ka Liang Synshar ïa kano kano ka Official Bill tang shu phah rah kti la jop lypa bad la long aiñ beit. Hato haba kumta lah ban jied ïa u ban don ha ka Liang Synshar ne ïa uba hap ban shong marwei ha ka Liang Pyrshah uba ym lah ban thaw aiñ namar hapoh Parliament phin ïeng marwei ne bad ka Liang Pyrshah ruh phin ym lah ban thaw aiñ” ong u Dr Nonglait.
U la ong ba kane ka jingwan tuid ki paidbah ka pyni ïa ka jingshaniah bad jingkyrshan jong ki paidbah ïa ka NPP ba kane hi kan long ka khubor jongka jingïatylli ban pynthikna ïa ka jingjop jong u kyrtong ka Party.
U la ong ba ka jingleit sha Delhi kan long ban leit bud dien ruh ryngkat ryngkat bad u Myntri Rangbah bad kiwei ki Myntri ka sorkar jylla ïa ki skhim, ki projek bad ban kyrpad ïa ka sorkar pdeng ban bei tyngka ban ïoh ban seng ïa ki karkhana rit ki ban ïarap ïa ki samla bad ki Nongrep ba kin ïoh ban shna ne thaw ïa kiwei ki jait jingbam na ki mar rep kiba mih na ka rep ka riang ne kino kino ki mar kiba kyrkhu da ka mariang.
U la ong ba ki samla bad ki long ïing longsem ki don hapdeng ka jingpisa bad lynga namar ka jingbym ïohkam ki khun ki kti kumta da ka jingïaleh ban wanrah ïa kine ki karkhana rit kan ïarap ïa ki spah bad hajar ngut ki khun samla ban ïoh kam ïoh jam bad ba kin lah ban bsa bad pyndap ïa la ki ïing ki sem. Wei ba la biang ka kam ka jam bad ka kamai ka jih tang katta ka shongsuk shongsaiñ kan ïai neh shirta ha kane ka jylla bad ka imlang ka sahlang.