Ryngkat bad ki nongkhaïi kynduh ka NPP Farmers Front ban tip ïa ka daw halor jinghiar dor ki marrep

Shillong, Naitung 22: Ka National People Party Farmers’ Front ka la pynpaw ïa ka jingsngewkhia kaba jur halor ka jinghiar dor jong ki mar rep kum u kubi bad kiwei pat ki jingthung jingtep jong ki nongrep hapoh ka jylla Meghalaya.
Haba kren ha ka jingïalang jong ka seng, u General Secretary ka NPP Farmers Front, Bah Egenstar Kurkalang, ryngkat bad kiwei ki nongïalam bad ki dkhot, u la ong ba bun ki nongrep ki la mad jingeh namar ka jinghiar kynsan ka dor jong ki mar rep, kaba la ktah jur ïa ka ïoh ka kot bad ka jingim jong shibun ki longïing kiba im da ka rep ka riang.
U Bah Kurkalang u la pyntip ba ka seng ka la ïoh pdiang shibun ki jingujor bad ki jingsngewkhia na ki nongrep na kylleng ki bynta jong ka jylla.U la ong ruh ba hadien ka jingïakren paidbah bad ka jingïatai ha ki social media halor kane ka bynta, ka seng ka la lum ïa kane ka jingïalang ban ïamir jingmut bad wad ïa ki lad jingïarap kiba lah ban pynbha biang ïa ka ïew ka hat jong ki mar rep.
Ha ka jingïalang, ka seng ka la dawa ïa ka Sorkar Jylla ba kan shim khia ban plie shuh shuh ïa ki ïew ki hat bad ki lad die mar sha kiwei pat ki jylla, khnang ba ki nongrep kin ïoh ïa ka dor kaba biang bad kaba hok ïa ki mar rep jong ki.
Ka NPP Farmers’ Front ka la kyntu ruh ïa baroh kiba don bynta bad ka kam rep kam riang, kynthup ïa ki nongrep, ki nongdie mar bad ki paidbah, ba kin ai ïa ki jingmut jingpyrkhat kiba tei lyngba ki jingthoh sha ka sorkar.Kane kan ïarap ban wad ïa ki lad ki lynti kiba paka ban kyntiew ïa ka rep ka riang bad ban pynbha ïa ka jingïoh ka kot jong ki nongrep ha jylla.
Ka NPP Farmers’ Front ka la pynskhem ba kan bteng ban ïeng ryngkat bad ki nongrep bad ban rah ïa ki jingeh jong ki sha ki bor ba dei peit, khnang ban pynjanai ïa ka kam rep kam riang bad ban kyntiew ïa ka roi ka par jong ka Meghalaya.