Leit buddien ka Estimate Committee jong ka Iing Dorbar ïa ka Pohkseh, New Shillong water supply scheme bad IT Park

Shillong, Naitung 22 : Ka Estimate Committee jong ka Iing Dorbar Thawaiñ ka Jylla ha ka sngi Balang ka la leit ban jurip ïa lai tylli ki projek kiba dang pyntreikam ha ka jylla kiba kynthup ïa ka Pohkseh Water Supply Scheme, ka New Shillong Water Supply Scheme ha Mawpdang bad ka 2nd IT Park Building ha Shillong Technology Campus.
Ïa kane ka jingjurip la lamkhmat da u Chairman ka Committee, u Bah Mayralborn Syiem, ryngkat bad ki dkhot ka Committee, ka Miani D. Shira, u Bah Renikton Lyngdoh Tongkhar bad u Remington G. Momin nalor ki ophisar na ka Meghalaya Legislative Assembly Secretariat, ka Public Health Engineering (PHE) Department bad ka Information Technology Department.
Katkum ka kyrwoh, la ïathuh ba ha ka jingjurip ïa ka Pohkseh Water Supply Scheme, ka Committee ka la bishar bniah ïa ka jingïaid shaphrang jong ka projek hadien ba ka pumping system ha ka jaka ba la buh mynshwa ka la julor katto katne snem mynshuwa.
Haba kren hadien ka jingjurip, na ka liang u Chairman ka Committee, Bah Mayralborn Syiem u la ong ba ka Committee ka la bthah ïa ka PHE Department ban wad da kawei pat ka jaka kaba biang ban pyntrei biang ïa ka projek, namar ka jaka ba don mynta kam long shuh kaba lah ban pyndonkam.
U la pynpaw ruh ïa ka jingkyrmen ba ka tnad kan pynkhreh noh kloi ïa ka revised estimate, bad ai jingïaroh ïa ka Dorbar Shnong Pohkseh kaba la ai jaka na ka bynta ka projek. U la ong ba tang shu dep ban pynskhem ïa ka jaka thymmai, yn lah ban bteng noh ïa ka jingtrei ban pynthikna ba ki longïing kin ïoh ïa ka umbam umdih kaba khuid.
Na Pohkseh, ka Committee ka la leit jurip ïa ka New Shillong Water Supply Scheme ha Mawpdang, ha kaba ki ophisar jong ka PHE Department ki la batai bniah ïa ka jingïaid shaphrang jong ka projek bad ïa ki bynta bapher bapher kiba la dep pyntrei, kynthup ïa ka treatment plant bad kiwei pat ki jingtei.
Haba bishar ïa ka jingïaid shaphrang jong ka projek, u Bah Mayralborn u la ong ba ka jingtrei bad ka jingpyllut pisa ki long kiba ïaid beit katkum ka jingthmu.
U la ïathuh ba katkum ka jingïathuh jong ki ophisar, ka bynta kaba nyngkong jong ka projek, kaba kynthup ïa ka dam, ka main gravity line bad ka treatment plant, yn pyndep bad plie paidbah ha u Nohprah 2027.
U la pynpaw ruh ïa ka jingkyrmen ba ka projek kan dep hapoh ka por ba la buh, katba ha ka bynta kaba ar yn sdang ban shna ïa ka distribution network ban pynpoi ïa ka umbam umdih sha ki shnong bapher bapher ha New Shillong.
Hadien kane, ka Committee ka la leit jurip ruh ïa ka 2nd IT Park Building ha Shillong Technology Campus. U Chairman u la ong ba watla ka Information Technology Department ka la mad bun ki jingeh ha ka jingpyntrei ïa ka projek, hynrei ka jingïaid shaphrang ha ka liang ka jingtei bad ka jingpyllut pisa ka long kaba pynhun.
U la ong ba ka jingtei ïa kane ka IT Park kan plie lad jingïohkam kaba bun ïa ki samla ka jylla bad kan long ruh ka jingïarap kaba khraw ban kyntiew ïa ka roi ka pa jong ka IT sector ha Meghalaya.
Ka Estimate Committee ka la ong ba kan dang bteng ban peitngor bad buddien ïa ka jingïaid shaphrang jong ki projek paidbah kiba kongsan khnang ban pynthikna ba kin dep ha ka por ba la buh bad ba yn pyndonkam hok ïa ki pisa paidbah na ka bynta ka jingmyntoi jong ki paidbah.