Pyllait paidbah u Myntri DoNER ïa ka Meghalaya Lakadong Turmeric Mission ha nongbah Delhi

Shillong, Naitung 21: Ïa ka Meghalaya Lakadong Turmeric Integrated Development Mission la pynlait mynta ka sngi da u Myntri, MDoNER, Jyotiraditya M Scindia, Myntri Rangbah ka Meghalaya, Conrad K Sangma, Myntri kam rep ka Jylla Timothy D Shira bad kiwei kiwei, ha ka jingialang bala pynlong ha Sanchar Bhavan, New Delhi, ba la ïashimbynta da ki nongïashimbynta na Shillong lyngba ka video conferencing.
Kane ka project ba T.175.45 klur la bei tyngka lang da ka Ministry of DoNER/NEC, Ministry of Agriculture & Farmers’ Welfare lem bad ka Sorkar Meghalaya.
Haba ai jingkren, u Myntri ka DoNER Jyotiraditya M Scindia, ula ong ba ka jingïalang ka dei ka dak jong ka jingpynlait ïa ka Mission Golden Spice kaba pyni ïa ka thong u Myntri Rangbah Duh, Narendra Modi na ka bynta ka roi ka par jong ki Jylla ka thain Shatei Lam Mihngi, kaba kynthup ruh ïa ki jingtei ba kynsai ka Jylla bad ka roi ka par ha ka imlang sahlang.
“Ki Jylla ka thain Shatei Lam Mihngi kim dei shuh tang u pud ka jingpynroi hynrei kila kylla long ki jaka pdeng jong ka roi ka par ka ri India” ula ong.
Ula bynrap ba ka thong ka phaikhmat eh halor ka jingpynroi ïa ki jingtei bad ki jingpynbiang ha ka imlang sahlang kum ki Iingsah, ka koit ka khiah bad ka pule puthi bad ka kynthup ruh ïa ka jingpynroi ïa ki jinglah ba kyrpang jong kawei pa kawei ka Jylla haba nujor ha ka thain, ka ri bad ka pyrthei.
U Myntri ula ban jur halor ka jingkongsan jong ka Unique Selleng Proposition (USP) ki Jylla bad ka bynta jong ki Kynthei ha ka imlang sahlang ki nongrep.
U Myntri ula ong ba ka jingsdang jong ka Mission Golden Spice ka dei ka prokram ban wanrah jingkylla da ka jingdon ka lad ban pynïaid iew ha kylleng ki ri ka pyrthei bad bynrap ba kane ka prokram kan pynkupbor ïa ki nongrep kynthei, haba ban jur ïa ka jingpynkynrïah ïa ka roi ka par na ka bynta ki kynthei sha ka roi ka par ba ïalam da ki kynthei ha India.
Haba ai khublei ïa ki nongrep kynthei namar ka jingtrei shitom bad synniang sha ka jingkyntiew ïa ka bor jong ka India ha ka rynsan ka pyrthei, ula pyntip ba ka jingkren u Myntri Rangbah Duh shaphang u shynrai Lakadong ka Meghalaya hapoh ka G7 summit ka dei ka jingjop kaba khraw bah. Ula ban jur ïa ka jingdonkam ban ïapyrshang lang da baroh ban pynthikna ïa ka jingïoh jingithuh da ka pyrthei ïa u shynrai Lakadong kaba la pynshong nongrim ha ka jingbha, ba dei hok, ba khlem khleh dawai bad ba ïai neh.
Haba ai jingkren, u Myntri Rangbah Conrad K Sangma ula ong ba ki Jylla ka thain Shatei Lam Mihngi kila ïohi ïa ki jingkylla hapoh ka Ministry of DoNER hapoh ka jingpynïaid u Myntri, Jyotirasitya Scindia da kaba phaikhmat sha ki bynta kum ka rep ka riang bad ki kam jngohkai.
Ula bynrap ba u shynrai Lakadong u dei uba pher bha na ka bynta ka ri-lum Jaintia bad ula pyni ïa ka jingdon ka curcumin ba kyrpang ka bym lah ban don ha kiwei pat ki thain wat hapoh Meghalaya. “Ka rukom long ka khyndew bad ka sawdong sawdong ha West Jaintia Hills bad East Jaintia Hills ka pynthikna ïa ka jingbha u shynrai Lakadong, kaba pynlong ïa u kum u mar ba dei eh na ka bynta ka mission” ula ong.
U Myntri Rangbah ula kren ruh halor ki jingai jingmyntoi jong kane ka prokram ïa ki nongsengkam kynthei bad nongrep da ka jingkylla ka jingim ki hajar ngut namar u shynrai Lakadong bad bynrap ba ka mission ka wan ha ka por kaba dei eh naba yn ïarap shikatdei eh na ka bynta ka jingkiew bad ka roi ka par ha kane ka kam.
Ula pyntip ruh ba ka Jylla kala pynthikna ïa ka jingpynmih mar na ki marrep bapher bapher da kaba ai ïa ki kor technology bad ka jingïarap song pisa. “Ka baikheng ka don na ka bynta ki nongrep, ki SHG bad ki kynhun lyngba ka song pisa bala buh da ka Jylla, kaban weng syndon ïa ka jingkhuslai ki nongrep halor ki kyndon ka Bank bad jingbuh bynda”.
Kiba ïadonlang ha kane ka jingïalang ki kynthup ïa ka Sukanta, Majumdar, Myntri Khynnah ka MDoNER, Secretary, MDoNER, Nivedita Shukla, Commissioner & Secretary, Meghalaya, Dr Vijay Kumar D bad ki nongmihkhmat na ki kompani Dr Hemanth Kumar Manikyam, Ziran India.