Kyrpad ka Meghalaya ban ïatreilang bad ka France ban kyntiew ïa ki kam ïalehkai ha ka jylla

Shillong, Naitung 20: Da ka thong ban pynkhlaiñ ïa ka jingïadei ha ka kolshor bad ka jingïalehkai sports, ka la don ka jingkynduh lang hapdeng u Consul General ka France ha Kolkata, u Thierry Morel bad u Co-Chairman ka Meghalaya State Planning Board bad Working President ka Meghalaya State Olympic Association (MSOA), John F. Kharshiing, kaba la long ha French Consulate ha ka sngi Nyngkong.
Ha kane ka jingïalang, u Bah John Kharshiing u la ïakren halor ki lad jingïatreilang bad ka France, khamtam ha ka jingkyntiew ïa ka jingïalehkai sports kynthup ïa ka jingïa sam ïa ki rukom ai jingpyntbit ïa ki nongïalehkai.
Ki arliang mamla ki la kdew ruh ïa ka jingjop jong ka prokram ba ïasam markylliang ha ka phutbol hapdeng ka Meghalaya bad kawei ka football club ha Lyon, France, kaba la ailad ïa ki samla nongïalehkai ka jylla ban ïoh jinghikai bad jingïoh jingtip ha ka kyrdan ba kham shalor.
Ki la mynjur ruh ban wad ki lad ban pynheh ïa kane ka jingïatreilang sha kiwei pat ki jingïalehkai sports.
Ha ka kyrwoh, u Bah John Kharshiing u la ong ba ka jingïalang ka la ïakren ruh shaphang ka India-France Memorandum of Understanding (MoU) on Sports Cooperation, kaba kynthup ïa ka jingïakylliang coach bad nongïalehkai, ka jingïarap ha ka sports science, ka jingpynkhlaiñ ïa ka sap treikam bad bun bha kiwei kiwei ki mat.
U la ong ba ka Meghalaya ka lah ban pyndonkam ïa kane ka jingïateh hapdeng ka India bad ka France ban kyntiew ïa ka kyrdan jingïalehkai sports ha ka jylla.