Ki lad pathai khubor kin long noh kum ka bynta ba kongsan jong ka ECI – Chief Election Commissioner ka Ri

Nongstoiñ, Naitung 20: Ka long ka jingkmen kaba khraw ba ka Election Commission of India (ECI) ka la ithuh kyrpang ïa ki lad pathai khubor ba kin long noh kum kawei na ki bynta ba kongsan jong ka Commission nangne shakhmat. Ïa kane la pynbna da u Chief Election Commissioner ka ri India, u Gyanesh Kumar, ha ka All India Media Conference kaba la long ha New Delhi, ha ka India International Institute of Democracy and Election Management, ha ka 17 tarik mynta u bnai.
Haba ai jingkren kum u kongsan ha katei ka jingïalang, u Gyanesh Kumar u la ong ba ka jingpynlong ïa ki election ha ka ri India ka ju bteng man la u snem ha jylla bapher bapher. U la ong ba shuwa ban pynlong ïa kino kino ki election, la ka long ka Lok Sabha ne ki Legislative Assembly Election, ka Election Commission ka ju pynrung thymmai ïa ki kyrteng jong ki nongthep vote kiba la kynjoh ïa ka rta kaba 18 snem.
Na ka bynta kane ka kam, ka Commission ka la bthah ïa baroh ki jylla ban thung ïa ki Booth Level Officers (BLOs) bad ki Booth Level Agents (BLAs) kiba leit sha ki shnong ki thaw ban lum ïa ki kyrteng jong kiba dei hok ban shah pynrung ha ka electoral roll lyngba ki phom kiba la pynbiang da ki District Election Officers.
U la ong ruh ba ban pynthikna ïa ka jingkheiñ kaba bniah bad kaba thikna, ki BLO ki hap ban trei shitom tam ban pyndep hok ïa la ka kam. Kumta, ban ïoh ïa ka jingtip kaba shisha bad kaba lah ban shaniah, ka Election Commission ka la rai ban ithuh ïa ki nongtrei ha ki lad pathaii khubor kum ki bynta ba kongsan bad kiba hakhmat eh jong ka Commission.
Haba kren shaphang ka rukom pynïaid ïa ki election sha ki Legislative Assembly jong ki jylla bad ki Union Territory, u la ong ba ki lad pathai khubor ki dei ki jingïarap kiba khlaiñ tam ha ka ban pynthikna ba ka election kan long kaba khuid, kaba lait na ka jingïalam bakla bad kaba ïaid beit ïaid ryntih. Dei halor kane ka nongrim ba ka Election Commission ka la rai ban ñiew ïa baroh ki nongtrei ha ki lad pathai khubor kum shi bynta jong ka jingïing jong ka Commission.
Nalor kata, u la ong ba ki paidbah nongshong shnong jong ka ri India ki lah ban sngew sarong namar ba ka India ka dei ka ri synshar paidbah kaba heh tam ha ka pyrthei. Ki bun ki ri ka pyrthei ki peit sha India kum ka nuksa bad ki angnud ban bud ïa ka rukom synshar paidbah kaba treikam na ka bynta u paidbah.
Ha kajuh ka por, u Gyanesh Kumar u la kdew ruh ïa ka Special Intensive Revision (SIR) kaba dang ïaid mynta ha baroh ki jylla jong ka ri. U la ong ba ynda la pyndep ïa kane ka jingpynbeit thymmai ïa ka electoral roll, kaba la khmih lynti ban kut ha u bnai Risaw, ka pyrthei kan sa ïohi ïa ka jingheh jong ka kam ba la pyndep.
U la ong ba kiba la shah pynrung kyrteng lyngba kane ka SIR ki dei ki nongshong shnong ba pura jong ka ri India.