Khnang ban kyntiew ïa ki lad jinghikai kam ïa ki samla ha ka thain shatei lammihngi

Delhi, Naitung 18 : Da kaba pynskhem ïa ka jingangnud jong ka ban pynïar ïa ki lad jinghikai kiba bha bad ban pynkhlain ïa ka jinglah ban ïoh kam jong ki samla ha ka thain shatei lammihngi (NER), ka Tnad Skill Development and Entrepreneurship (MSDE) ka la pynlong ïa ka jingpynjlan ïa ka jingïarap ba kyrpang ban kyntiew ïa ka jinghikai ïa ka thain shatei lammihngi hapoh ka Prime Minister’s National Apprenticeship Promotion Scheme (PM-NAPS) na ka bynta u snem mang tyngka 2026–27, ban pyntreikam da ka Indian Institute of Entrepreneurship (IIE), Guwahati. Da kaba tei halor ka jingjop jong ka sienjam ba la sdang ha u bnai Jymmang 2025, ka jingïarap ba la pynjlan ka thmu ban pynkhlain ïa ka jingrung jong ki jinghikai kam ha baroh ki phra tylli ki Jylla jong ka thaiñ Shatei Lammihngi, ban kyntiew ïa ka jingïashim bynta jong ki karkhana bad ki jaka treikam jong ka sorkar, bad ban wanrah ïa ki lad ki lynti ba ïadei bad ka kamai kajih kaba ïaineh na ka bynta ki samla jong ka thaiñ hapoh ka Skill India Mission.
Ka Tnad ka la pynïar ïa ka jingpyntreikam ïa ka jingïarap na ka bynta u snem mang tyngka 2026–27 da kaba buh thong kham heh ban long 30,000 ngut ki shah hikai kam, ka jingkiew kaba long kumba 15 per cent ha ka bynta ba dang sdang. Na kine, 15,000 ngut ki shahhikai kam yn kyrshan na ka bynta ki lad ki lynti shabar jong ka thaiñ Shatei Lammihngi, kynthup ïa ki Tnad Sorkar bad ki Public Sector Undertaking (PSU), katba sa 15,000 ngut kin trei hapoh ka thaiñ, kynthup hapoh ki Jylla ba ki shong ki sah.
Ka Sorkar ka la mang pisa haduh T.57.58 klur na ka bynta kane ka sienjam ha u snem mang tyngka 2026–27. Ïa ka jingmang yn pynbiang lyngba ka bynta jong ka thain shatei lammihngi jong ka PM-NAPS.
U Jayant Chaudhary, Myntri Khynnah (I/C) ïa ka Tnad Skill Development and Entrepreneurship bad Myntri Khynnah ka Tnad Pule Puthi jong ka Sorkar India u la ong, “Ka thaiñ shatei lammihngi kadei kawei na ki jaka ba khlaiñ tam jong ka ri India, kaba don ïa ki samla, kiba don sap bad kiba don ka jingangnud ban noh synniang sha ka khana jong ka jingkiew shaphrang jong ka ri. Ka jingjop kaba phylla jong ka sienjam ba nyngkong ka pyni ba da ki lad bad jingkyrshan kiba biang, ki samla jong ngi ki lah ban plie ïa ka lad kaba pura jong ki. Da kaba pynjlan ïa kane ka jingïarap hapoh ka PM-NAPS, ngi pynjlan ïa ka jinglah ban ïoh ïa ki lad jinghikai kiba bha, pynkhlain ïa ki jinglong jingman ha ka thain, pynshlur ïa ka jingïashim bynta ha ki kam karkhana, bad plie lad ïa ki samla na ka thain ban ïoh ïa ka jingshemphang kaba kongsan ha ka jaka trei hapoh ka thain shatei lammihngi bad ha kylleng ka ri.”
Ka jingïarap ba la pynjlan ka pynïar ruh ïa ka jingkynthup jong ka jingïarap pisa kaba kaba T.1,500 shi bnai, halor ka jingkyrshan kaba lah ban ïoh hapoh ka PM-NAPS. Katba ka kam kaba nyngkong ka kyrshan nyngkong eh ïa ki shahhikai kam kiba leit shabar jong ka Jylla ba ki shong ki sah, ka sienjam ba la pynthymmai mynta kan kynthup ïa ki shahhikai kam kiba trei hapoh ki Jylla trai jong ki ha ka thaiñ Shatei Lammihngi.
Nalor ka jingïarap pisa, kane ka sienjam kan dang bteng ban pynleit jingmut ha kaba pynkhlain ïa ka rukom hikai kam lyngba ki workshop, ki campaign ai jinghikai, ki prokram ïatreilang bad ki nongai kam bad ka jingïatreilang bad ki jaka pule bad ki nongshim bynta ha ka kam karkhana ha kylleng ka thain.
Ka sienjam ba nyngkong ka la ai ïa ki jingmih kiba ai mynsiem hapoh ka snem kaba nyngkong. Pyrshah ïa ka thong ban ïoh 26,000 ngut ki shahhikai kam, ka prokram ka la pynsuk ia ka jingpynrung ïa ki 23,470 ngut ki shahhikai kam, kaba la pynurlong palat 90 percent na ka thong jong ka. Ka jingïashim bynta ha ka kam hikai kam ha ka thaiñ ka la kiew da 51 percent, kaba la kiew na ka 15,562 ha u snem mang tyngka 2024-25 sha ka 23,470 ha u snem mang tyngka 2025-26. Ka sienjam ka la kyntiew ruh ïa ka jinglah kynriah kam, ha kaba 13,673 ngut ki shahhikai kam ki la ïoh ïa ki lad ki lynti shabar jong ka Jylla ba ki shong ki sah katba 9,797 ngut ki shahhikai kam ki la trei hapoh ka thaiñ Shatei Lammihngi.
Ka jingïarap ba nyngkong ka la sakhi ïa ka jingkiew kaba pynshlur ha ka jingïashim bynta ha ka jinghikai kam ha kylleng ka thain shatei lammihngi, ha kaba ka Meghalaya ka la ïoh ïa ka jingkiew kaba heh tam kaba long 95 percent. Ki kynthei ki la paw kum ki nongïoh jingmyntoi ba kongsan, da ka jingkiew kaba paw ha ka jingïashim bynta jong ki kynthei ha ka jinghikai kam. Ka jingïashim bynta jong ki nongpyntreikam ruh ka la nang kiew bha, ha kaba ka jingïashim bynta ha ki jinghikai kam lyngba ki jaka treikam Sorkar ka la nang kiew ar shah bad ka jingïashim bynta jong ki riew shimet ka la sakhi ïa ka jingkiew kaba khraw.
Da kaba pynïar ïa ka jinglah ban ïoh ïa ki jinghikai pyntbit kiba ïadei bad ka kam karkhana bad ki lad ïoh kam, kane ka sienjam ka pynskhem biang ïa ka jingangnud jong ka Sorkar ban pynkupbor ïa ki samla ka thain shatei lammihngi bad ban pynsted ïa ka jingkiew shaphrang kaba kynthup lang lyngba ka Skill India Mission.