Shillong, Naitung 17: Ka District Medical bad Health Officer, ka East Khasi Hills District, ka la pymih da ka jingpynbna halor ka koit ka khiah ki paidbah ba kin sumar bad ban ïada ïalade na ki jingpang kiba jia man ka por ha kum kane ka por lyiur.
“Ka tnad ka koit ka khiah kala ai jingmut ban sumar ki paidbah ïalade na ki jingpang jingshitom kiba kynthup ïa ka jingpang ba ïoh na u kaiñ pyrjong, jingpang shit met, um bam um dih bad kino kino ki jingpang ba ngat na ka jingbam ba ngi bam bad ka jingpang naba bam ïa u tit”.
Ki jingïada ki kynthup ïa ka jingbym dei ban pyllang ïa ki um hajuh bad sawdong ka ïing kynthup ïa ka tiar jyndiang ba la rim kum ki taiar kali bad ki khiew plastik; da kaba pyndonkam da ki musari lane ki jingtah ban ïada na u kain dait bad ban phong da ki sopti ba jrong kti khamtam ha ka por janmiet, dang step bad haba leit iaid kai.
Ban kiar na ka um jaboh lane um shlei, bad lada la ktah ha ka, dei ban sait noh mar mar da ka sabon bad ka um kaba khuid; ban buh bha ïa ka bam bad buh pynpjah haduh ar kynta bad pynkhuit bha haduh 75 ?elcius bad ym dei ban bam iaki jingbam ba la sah ne bym tap bha.
Ban sait khuid ïa ki kti hashwa ban bam, shet jingshet, hadien ba la dep leit pynjhieh bad hadien ba la ktah ïa ki mrad; dei ban lehkhuid bad bret lut ki jaboh jabain ba don ha iing khnang ban nym wan khnai, ym dei ban sait ïa ki jain jong ki nongpang ba shitom pynhiar kpoh hajan ki pung ne wah ne ha ki jaka tong um.
Ym dei ban leit shabar halor riat ne jan bad ki nongbah um, naba ka um slap ka lah ban pynsniew ne pynjakhlia iaka um kaba ngi dih. Ki dei ban kiar na ka ban ri sniang hajan ïing shong, lada lah ban leh kumta bad wat bam ïa ki tit ba long khlaw ne kiba ngim tip.
Ki jingdonkam ban leh hapoh ki skul, ki ophis bad ki jaka pynrit ki kynthup ia ka jingpynlong man ka taiew ia ki kam ban pynduh jait ïa ka um kaba lang. Ban pynkhuid iaki phyllaw bad ban bret ne pynduh beit ïa ki ñiut ki nier.
Ban pynbiang ka um dih kaba shngain bad ki jaka pynkhuid kiba biang. Ban pyntip mar mar sha ka jaka sumar kaba jan tam haba iohi ba bun briew ki ioh ka jingshit met ne ka pang pynhiar kpoh. Ka jingpynbna ka ong ruh ba bun na ki jingpang kiba wan ha ka por ba thikna lah ban tehlakam da ka jingkhuid ka ba biang, ka mariang kaba khuid, ka jingkiar na ka jingioh pang, bad ka leit shim dawai ha ka por kaba dei.
