Ha ka NFHS sdang paw soh ka jingtrei borbah ka tnad ka Koit ka Khiah ha Meghalaya

Shillong, Naitung 16: U Myntri Rangbah ka jylla, Conrad K. Sangma, u la ong ba ka Meghalaya ka la pyni ïa ka jingkiew kaba khraw ha bun ki bynta jong ka koit ka khiah katkum ka National Family Health Survey (NFHS) Report 2025, kaba pynpaw ba ki jingtrei jong ka sorkar ha kane ka bynta ki la sdang ban sei soh.
Haba kren sha ki lad pathai khubor hadien ka jingïalang bishar kam jong ka Health Department ha ka sngi Palei, u Myntri Rangbah u la ong ba ka jylla ka la kiew ha jan baroh ki liang haba ïadei bad ka koit ka khiah.
“Nga sngewkmen haduh katta katta ban ïohi ba ka Meghalaya ka la kiew bha ha jan baroh ki liang. Kane ka pyni ba ki jingtrei bad ki sienjam ba ka sorkar ka la shim ha ka liang ka koit ka khiah ki la sdang ban wanrah ïa u soh uba bha,” ong u Myntri Rangbah.
U la ïathuh ba ha ka jingïalang la bishar ruh ïa ka jingïaid shaphrang jong ki projek bad ki jingbei tyngka ha ka koit ka khiah, kynthup ïa ki District Hospital, Primary Health Centre (PHC), Community Health Centre (CHC) bad ki Sub-Centre ha kylleng ka jylla.
U Conrad u la ong ba watla ka jingheh jong ki projek ka dang donkam shibun ki kam ban pyndep, hynrei ka jingïaid jong ki kam ka long kaba pynhun.
“Ki kam ki la nang ïaid shakhmat bha. Watla dang don bun ki bynta kiba donkam ban pyndep, hynrei ngi sngewkmen ïa ka jingïaid shaphrang bad ngin dang bteng ban shim shuh shuh ki sienjam ban pynkhlaiñ ïa ka jingpynbiang ïa ka koit ka khiah haduh ki shnong nongkyndong,” u la ong.
Haba ïakren halor ki Medical College, u Myntri Rangbah u la ong ba ka Shillong Medical College ka la rung mynta sha ka snem ba-ar naduh ba la sdang pyntreikam ïa ka.
U la ong ba namar ka jingwan rung jong ka batch ba thymmai jong ki samla pule, ka donkam ban pynbun ïa ki kamra klas, ki nonghikai (faculty), ki jaka ai jinghikai bad kiwei ki jingtei kiba donkam.
“Kine ki mat la ïakren bniah bad ngi la mynjur ban pyntrei ïa ki ha ki bynta bapher bapher (phase-wise), khnang ba kan ym don kano kano ka jingduna ha ka liang ki jingtei bad ba ka Shillong Medical College kan lah ban pyndep ïa baroh ki kyndon ba la buh ha ka ri,” ong u Conrad.
Nalor kata, la bishar ruh ïa ka jingïaid shaphrang jong ka Tura Medical College. Halor kane, u Myntri Rangbah u la ong ba ka sorkar ka la dep pynlong lai sien ïa ka jingthungkam na ka bynta katei ka Medical College bad ka dang bteng ban shim ïa ki sienjam ban pynthikna ba ka projek kan ïaid shakhmat katkum ka jingthmu.