Khrui ïakynduhlang ki nongshong shnong ka NE India kiba sah ha UK ban pynneh la ka tynrai

London, Naitung 16: Ki nongshong shnong na ki jylla bapher bapher jong ka thain shatei lam-mihngi jong ka ri kiba don mynta ha United Kingdom ki la ïalum lang khrui ban rakhe ïa ka kolshor bad ka jingriewspah jong ki jylla Shatei Lam Mihngi ha ka prokram “United Colours of North East India”, kaba la long ha Indian Gymkhana Club, London ha ka 11 tarik Naitung.
Ïa kane ka prokram la pynlong da ka North East Indians in UK (NEIUK) bad la kyrshan da u Pradyot Bikram Manikya Debbarma, uba long u khlieh jong ka ïing syiem ka Tripura. Ka jingïalang ka la wallam lang ïa ki briew na baroh phra tylli ki jylla Shatei Lam Mihngi kata ka Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura ban pyni ïa la ki jong ki riti dustur, ka kolshor bad ka pateng tynrai.
Haba kren halor ka jingthmu jong kane ka sienjam, ki nongpynïaid ki la ong ba ka long ban pyni ïa ka jingriewspah jong ka kolshor jong ki jylla Shatei Lam Mihngi sha ka pyrthei bad ha kajuh ka por ban pynskhem ïa ka jingïadei hapdeng ki nongshong shnong na kane ka thaiñ kiba sah ha UK.
U Thoiba Thoudam na Manipur u la ong, “Ka jingthmu jong ngi ka long ban wallam lang ïa ki briew na ka thaiñ Shatei Lam Mihngi bad na kiwei ki bynta jong ka pyrthei ban rakhe ïa ka jingriewspah bad ka jingitynnad jong ka thaiñ lyngba ki jingbam tynrai, ka rwai ka siaw, ka put ka tem, ki riam ki beit bad bun kiwei pat.”
Ka jingïalang ka la pynpaw ruh ïa ka jingdonkam ban sumar ïa ki riti dustur tynrai bad ban ai pateng ïa ka jingtip shaphang ka kolshor sha ki pateng ban wan.
Ki nongpynïaid ki la ong ba kane ka jingïalang ka la ai ruh ïa ka rynsan ban pynkhlaiñ ïa ka jingïadei hapdeng ki longïing, ki samla pule, ki nongsengkam sengjam, ki nongshna bad kiwei pat ki dkhot jong ka thaiñ kiba sah ha UK.
Ki la ong ruh ba kum kine ki prokram ki long kiba donkam ban pynsngewthuh shuh shuh ïa ka pyrthei shaphang ka histori, ka jingïapher ka kolshor, ka jinglong jong ki jaitbynriew bad ka jingnoh synñiang jong ki jylla Shatei Lam Mihngi.
Kane ka prokram ka la long ruh kum ka jingïalang kaba heh kaba nyngkong eh ha London ban wanrah lang ïa baroh phra tylli ki jylla Shatei Lam Mihngi ha kajuh ka jaka. Palat 500 ngut ki briew na kine ki jylla ki la wan shim bynta ha ka jingïalang.
Ka Susan Nongsiej, kaba mihkhmat ïa ka Meghalaya, ka la ong, “Ka jingwan bun jong ki paidbah ka pyni ïa ka jingïatylli, ka jingïohi jngai bad ka jingsngew sarong jong ki nong Shatei Lam Mihngi ka ri kiba sah ha UK.”
Kawei na ki bynta kaba la pynkmen eh ka long ka jingïashim bynta shitrhem jong ki samla kiba la kha bad heh ha UK. Ki la ïoh ban tip bad mad ïa ki kolshor, ki riti dustur, ki rwai, ka shad tynrai, ki jaiñ tynrai bad ki jingbam ba kyrpang jong ki jylla Shatei Lam Mihngi ha kajuh ka jaka.
Ki nongwan jingïashim bynta ki la ai jingïaroh ïa ki nongpynïaid bad ki volunteer kiba la pynlong ïa ka prokram kaba pynkynmaw ïa ka ïing ka sem.
Ka Cherrie L. Chhangte na Mizoram ka la ong, “Ka dei ka prokram kaba itynnad tam kaba la palat ïa ka jingkhmih lynti jong nga. Ki jingshad, ki jingrwai, ki jingbam bad ka jinglong jong ka prokram baroh kawei ki la pynkynmaw ïa nga ïa la ka shnong ka thaw. Ngam ju mutdur ba yn lah ban wanrah ïa ka Shatei Lam Mihngi ha London kumne.”
Ka Fellisha Marwein, kaba la shim bynta ha ka Fusion Collection Fashion Show, ka la ong, “Ka long ka burom ïa nga ban mihkhmat ïa ka Meghalaya bad ka thaiñ Shatei Lam Mihngi lyngba ka Fusion Collection. Kane ka jingïoh bynta ka pyni ba ka jingïakhring paidbah lyngba ka riam ka beit (fashion) ka lah ban pynïasoh ïa ki kolshor bapher bapher bad pynlong ïa ki briew ban sngewthuh kham bha ïa ka pateng tynrai jong ngi.”
Ki nongpynïaid ki la ong ba ka jingjop jong ka United Colours of North East India ka pyni ba lyngba ka jingïatreilang jong ka imlang sahlang lah ban sumar bad pynneh ïa ka kolshor tynrai, bad ban pyni ruh ïa ka sha ka pyrthei. Ki la pynpaw ruh ïa ka jingkyrmen ba kum kine ki sienjam kin nang bteng ban ai mynsiem ïa ki pateng ban wan ban ieid, ban sumar bad ban pynneh ïa ka kolshor kaba riewspah jong ki jylla Shatei Lam Mihngi.