Shillong, Naitung 16 : U Myntri ka tnad pynmih bording ka jylla u bah Metbah Lyngdoh ha ka Sngi Palei u la pynpaw ba ka jingshah bat bording elektrik jong ki lai ngut ki khynnah ha Ri Bhoi ka dei ka jingjia kaba shu jia ryngkat bad ka sorkar ka dang pynkhreh ban ai jingïarap sha ki longïing longsem jongki hadien ba la ïoh ïa ka kaiphod.
Haba kren halor kane ka jingjia u bah Metbah u la ïathuh ba ka tnad jongu ka la leit jngoh ïa katei ka jaka ba jia ka jingjia bad u dang ap ïa ka kaiphod ba bniah na u Commissioner bad Secretary ka tnad pynmih bording.
“ Kane ka jingjia ka la jia namar ka jingkdiah bad hap ki tnad dieng halor u sainar 11 KV. Khlem da poi pyrkhat kiba pli kitei ki lai ngut ki khynnah ki la ïaid lynti na katei ka jaka bad jia kane ka jingjia ba sngewsih ïa ki.
Halor ka jingsiew jingïarap sha ki longïing longsem jongu u la ong hooid kat kum ka polisi treikam ka tnad kan sa siew jingïarap tangba dang hap ban ap haduh ban da ïoh ïa ka kaiphod kaba bniah.
U la kren bynniaw ruh halor ka jingbym lah ban pynbiang ne kylliang ïa ki sainar bording ha Ri Bhoi namar ka dei kaba shisha ba ki la rim bha.
“ Kane ka dei ha kylleng ki jaka jongka jylla bad ka Ri Bhoi ka dei kawei na ki district kaba ngi ïa kynduh ïa kane ka jingeh. Ki tiar ki la rim bha bad donkam ban pynthymmai ïa ki bad ngin sa hap hi ban leh kloi” ong u bah Metbah.
U la ïathuh ba ka Dorbar Shnong ruh ka la ai jingthoh bad ki ruh ki la pynpaw ba ka jingjia kaba shu jia ryngkhat bad u la ong ruh ba ka tnad hi kam shym leh khnang hynrei ka jia ryngkhat katei ka jingjia ba sngewsih.
