Yn peit hi ka tnad Urban Affairs ban pynthaba ïa ki surok da ka bording bad weng ïa ki waïar ba sdien ha suiñ : Dy. CM

By Mawphor Editor On Jul 16, 2026

Shillong, Naitung 15: Ka Nongbah Shillong ka la pynkhreh ban ïoh ïa ki lynti ïaid kiba tbeh jingshai bad ka suinbneng kaba khuid , da ka jingmynjur ka Tnad Urban Affairs ïa ka Plan ba thymmai ban khmih hi ïa ki jingpynthaba ïa ki surok da ka bor ding elektrik bad ban weng noh ïa ki wire kiba sdien rynjaiñ ha ki post elektrik na suiñ.
U Symbud Myntri Rangbah ka Jylla uba khmih ïa ka tnad pynroi sor, u Ma Sniawbhalang Dhar, ula ong ba ka Sorkar ka dang trei ïa ka kam, ha kaba kano ka tnad kan khmih ïa ka kam kaba kumno, ban pynkut ïa ka jingkulmar jingmut ha ka ban khmih bad ban sumar.
“Ngi dang don ha ka kam. Ban ïaid shakhmat, ïa ki bor ding ha kylleng ki jaka yn sa khmih da ka Municipal Board. Ka tnad Bording bad ka Smart City ruh kin sa shim khia ïa ki jingtyrwa” ong u Ma Sniawbha.
Ka detailed project report (DPR) na ka bynta ka projek ban buh ïa ki street light ka dei kaba lah dep. Ka tnad mynta kala pynlong ïa ki jingïalang bad ki Rangbah Shnong ban ithuh ïa ki jaka kiba donkam bha ha ka wat kaba nyngkong.
“Jan man la ki jaka kiba kongsan kin sa shah kynthup ha ka wat ba nyngkong. Ka Municipal Board kan sa khmih bad sumar ïa ki. Ki don katto katne ki jaka kin dei ki ban neh beit bad ka tnad bording” ula ong.
U Ma Sniawbha ula ong, ba ka jingthmu ka long ban phiah ïa ka jingkitkhlieh. “Ngi lah poi sha kaba kut, kumta kan ym don shuh ka jingkulmar jingmut. Ngin sa pynthikna ïa ki jaka, kiei ki tnad la ka dei ka Municipal ne Bording ki ban khmih ïa kitei” ula ong.
U Myntri ula kren ruh halor ka jingthmu ka Jylla ban pynkhuid ïa ki wire Cable kiba noh rynjaiñ ha sor Shillong.
“Ia kane la shim khia da ka Tnad Urban Affairs. U Myntri Rangbah ula dep ban jurip ïa ki jaka bad ula ai ruh ka jingpynbna. Ngin ïaleh ban kynthup ïa baroh ki jaka kiba kongsan kiba don bun bha ïa ki wire kiba noh rynjaiñ bad ngin sa pynkynriah bha noh ïa ki. Ka thong ka long ban pynkylla ïa ka sor kaba khuid bad itynnad” ong u Ma Sniawbha.