Naduh ka 20 tarik buh tarik ki ar seng ban pynurlong noh ïa ki mad jingdawa na ka JHADC

Jowai, Naitung 15 : Mynta ka Sngi ka Jaiñtia National Council JNC Central Executive Committee bad ka Jaiñtia Students’ Union Central Body kala shong meeting kyrkieh ha kaba ïadei bad ka Rally kaba lah long mynnin ka sngi sha JHADC, hadien kane naka liang u President ka JNC bah Sambormi Lyngdoh haba ai jingkren sha ki lad pathai khubor ula ong ba “haba ngi peit ïaka jingkren Jong u CEM u Ma Thombor Shiwat uba ong ba nangno ïoh bor kine ki ar seng ban tur sha District Council.
U ong haka jingshisha ngi lah pyndep ïaka kamram Jong ngi ban pan bor naka ophis u DC hynrei ngim ïoh jubab eiei, kumba ngi tip ba ngi dei ka democratic country ngi don ïaka hok ban ïakhih hano hano.
Kaba ar u CEM u ong ba um tip eiei shaphang kane ka rally jong ngi, kane hi ka pyni ïaka jingtlot u CEM namar hashwa ba ban ïaid ïaka rally ban pyrshah ïaka shree cement kam dei shuh kaba thymmai, naduh mynshem snem ngi la pynlong iaki jingïakhih ha Shillong, ha DC ophis Khliehriat, katba ngi sngewlyngngoh pat ba u CEM um tip ïakane ka issue, ka jingshisha hi ngi lah dep ban pynbna khubor lyngba ki media. Kaba pynlong ïangi ban ïakhih ka dei hajrong ka jingud ki nongshong shnong ka Elaka Nongkhlieh halor ka jingshah knieh jubor ïaka jaka puta ka jong ki hapoh ka jingïalam u Dolloi uba bynda ïa kine ki jaka khlem ka jingtip Jong ki trai jaka kiba don daki spah spah Hektar, la banjur utei u President.
Wat ka Elaka Sutnga ruh kala kam ba maka ruh ka mad ïakane ka juh ka jingshah knieh jong ki jaka jong ka hapoh kato ka 217 naki 652 Hektar jong ka jingthmu ka Shree Cement ban tih mawshun.
Katkum ka jingsngewthuh bad jingtip jong ngi ki ar seng ba iaka kynrum kynram jong ka khyndew ka shyiap ka dei ban peit daka District Council, kaba la pynkupbor naka Constitution of India lyngba ka 6th Schedule ban peit khnang ïaka huri hura ka khyndew ka shyiap, u pud u sam. Hynrei sngewsih ba une u CEM um pat tip ïaka nongrim jong ka jingïakhih jong ngi ki ar seng.
Hooid kumba ka statement jong u CEM u ong Ngam tip eiei shaphang kane ka rally, hynrei haka juh hi ka jingkren jong u, u ong pat ba ha shwa ba ki ar seng bad ki Elaka Nongkhlieh u la phah lypa ïaki pulit ban pahara. Ula ong ruh ba kim kwah ban ïakren hynrei tang ban pynsawa slogan ne ban pynibor ïaka ophis ka jong u. Katba ngi ngi lah pynkhreh wat ïaka memorandum ban aiti sha u CEM. Pynban u CEM u ong ba u kwah ban ïakren hynrei um kwah pat. Katkum ka khubor kaba kila ïoh na kaba ong ba u CEM u don ha kamra hynrei ha shwa ba ngin poi u la phet noh ryngkat ki EM, tip na kaei ka daw. Te kane hi ka jingkren jong u CEM ka pyni shai ba u kwah tang ban tlep eit miaw ïa kaei kaba ka JHADC ka kum shah pynïaid haki bor ba nabar.
Haba phai pat sha ka NOC, u CEM u ong ba ka JHADC ka ai halor ka jingkyrpad naka elaka bad naka shnong, hynrei haba ngi phai dein pat shaka jingkren jong u CEM ha kiwei naki session ha JHADC, u ong ba dei ka jingpynbor jong ki bor halor sa ai pat ïaka NOC. Kane ka pynkulmar jingmut shisha. Lada phai shaka sanad jong ki Dolloi bala pynmih naka JHADC, lah kdew shai ba ki Dolloi kim dei ban ai NOC ïa kano kano ka kompany khlem ka jingmynjur ka elaka bad ka Fistrict council. Kane hi ka pyni ba u CEM um dei u briew ba biang haka kam, lane um dei u briew uba tip ïaki aiñ ki kyndon jong ka District Council.
Naka Liang u President ka JSU u Jersom Shylla, ula ong , ka jingïaid Rally ka jong ngi mynnin ka dei hadien ba ngi lah pan ïaka permission, ngi don ïaka hok ban ïakhih. Katba u CEM pat u kynthoh ba ngi wan ban pyntieng pynsmiej ïaki nongtrei, ngi wan da kawei ka jingthmu kata ban ïakhih daka jingsuk, halor ka jingshah knieh ki jaka ki nongrep bad ki nongshong shnong ka Elaka Nongkhlieh khlem ka jingtip jong ki.
‘Ngi sngew phylla ruh haba ngi wan hangtei, u CEM bad ki EM kila phet noh bad ka khang tala ïaka main gate jong ka JHADC. Hato ka JHADC kadei ka ïing shimet u CEM ??? Buh jingkylli utei u President. Ngi wan khlem kino kino ki tiar ïaleh bad ka Riti Synshar ka Ri India ka la ai bor ban ïakhih ne pynlong ïakhih hano hano (without arms).
Ngi wan ban pynsngew ïaka jingkwah bad jingthrang ki Elaka Nongkhlieh, tangba sngewsih ba u CEM u ong ba ngi wan ban pyntieng pynsmiej, haba ngi pynlong jingïalang hakhmat ka ophis ka District Council baroh ki nongtrei ki ïeng habar ban sngap ïa kaei ka sur ka jingïakhih u Paidbah, hynrei kat u CEM um don ka jingkitkhlieh ban sngap ïaka sur u Paidbah. Kita ki MDC kiba ngi lah phah ban shna ïaki aiñ ban kitkhlieh ïa u Paidbah, hynrei phewse jin ba ki long kiba kitkhlieh ka jingïakhih kan nym long mynnin, ngi lah pyrshang ruh ban ïakren shi kynta shiteng ban kyrpad ban plie ïaka gate namar kane ka dei ka ophis u Paidbah, ngi kwah ban ïakren, hynrei haba kim plie pat ïaka gate kum ki nongïalam ngin ong aiu, haba u Paidbah ula bitar, ngim lah ban bahkhlieh, namar ka bor ka shong ha u Paidbah.
Hynrei wat la katta ruh ngi sngewnguh pat ba u Paidbah u sngap ïaka jingkren jong ki nongïalam bad u sa jai jai pat.
Ula ai khublei ruh ïaka police department kaba ym shym lah pyndonkam daka bor ïaki Paidbah, kane ka pyni baka Police department ka don ïaka jingsngewnguh naka bynta u Paidbah, ngi sngewnguh ruh ïaka District Administration kaba sngewthuh bad kiba control ïaka situation ryngkat bad ki nongïalam sengbhalang.
Shuh shuh u ong ngi wan ym ban pynibor lane ban ïa umsnam bad ki pradoh prasnam, hynrei ngi wan naka bynta ka jingeh ki nongshong shnong ka Elaka Nongkhlieh, bad lada ngi ki nongïalam ki ar seng lada ngim mih shakhmat mano pat ban ïada ban ai bor ai Mynsiem ïaki ??.
Ïaka jingkynthoh jong u CEM ai ba un kynthoh kam pher, hynrei ngi ngin ïeng skhem naka bynta ka Ri bad ka jaidbynriew.
Sa kawei utei u President u kwah ban ong ba hadien kato ka jingïakhih la ïoh khubor ba u CEM ula wan baing shaka ophis treikam jong u hadien ki kynta ba lah wai ka por treikam, Ngim tip balei u wan hadien ka por balah wai ka ophis timing, ula ujor ïangi daka FIR, bad ka case kala ïaid shakhmat, bad ïa kane hi ngi shañiah haki legal expert jong ngi, ai ba ka aiñ kan ïaid ïaka jong ka bynta jong ka, hynrei kane hi kam dei bakan lah ban theh umpjah ïa ka jingïaleh jong ngi, hynrei kane pynban kan pynklang biang ïaka Mynsiem ïaleh ka jong ngi.
Kum ka seng ka kwah ruh ban pyntip sha ki Paidbah ba halor kato ka jingdawa ban weng ïa u Dolloi bad ka NOC ka Shree Cement, ka dang bteng hadien kane ka BEHDEIÑKHLAM, kata kin buh daka DEADLINE Naduh ka 20 tarik, ba hadien kane lada u CEM um leh eiei naka Liang ki ar seng kin sa wad da kiwei pat ki lynti bad ban pteng ïaka jingïakhih bad ban dawa ruh shisyndon ba u CEM u dei ban hiar shuki noh, namar u briew uba dei peit ban leh ïaka kam kum u khliehdooh ka JHADC, namar haka jaka ban ïada u bynda pynban bad kum une u dei ban hiar shuki noh shisyndon, Pynkut u Jersom Shylla.