Shillong, Naitung 15: Ka East Khasi Hills District Badminton Association (EKHDBA) kan pynlong ïa ka sienjam kaba 10 jong ka lympung ‘EKHD Open Badminton Championship 2026’ naduh ka 28 haduh ka 30 tarik u Naitung ha Glades Sports Arena, Mawlai Mawroh.
Kane ka Championship kan kynthup ïa ki kyrdan ïakhun bapher bapher ba kynthup ïa ka Men’s singles bad doubles, women’s singles bad doubles, bad ki kyrdan ïalehkai katkum ka rta ba kynthup ïa ka U-13, U-15, U-17 bad U-19.
Kumta na ka liang ki nongpynïaid ki la kyntu ïa kino kino kiba kwah ban ïashim bynta ba ki dei ban pynpoi ïa ka syrnot kha (birth certificate), ka Aadhaar card, ka EPIC (lada don) bad ka syrnot jaka sah (residential certificate).
Ki nongïalehkai kiba shim bynta ha ka kyrdan U-13 ki dei ban long kiba la kha ha lane hadien ka 01 tarik Kyllalyngkot 2014. Kane kan treikam ruh ïa ki kyrdan U-15 (01 tarik Kyllalyngkot 2012), U-17 (01 tarik Kyllalyngkot 2010) bad U-19 (01 tarik Kyllalyngkot 2008).
Na ka bynta ka bai rung lah ban pdiang tang lyngba ka email (balasyiem_bs@rediffmail.com) lane WhatsApp sha ka kong Balarina Syiem u number 9402300795 lane sha u bah Aibor Ranee u number 9856709479.
Ka tarik ba khatduh ban pynpoi ïa ka bai rung kan long ha ka 21 tarik Naitung 2026.
