Lada phi thmu shisha ban ym ailad ban khlong ïa u Uranium napoh ka jylla Meghalaya: Rueben

Shillong, Naitung 14: Ka Khasi Student Union seng kmie kala kyntu ïa ka sorkar jylla ba kam dei ban shu bun tang ka nia hynrei kala dei ka por ba kam pyni da ka kam ban pass da ka Resolution hapoh ka ïing dorbar thaw aiñ ka jylla ban pyni shai sha ka sorkar India ba ha Meghalaya dalei lei phin ym ioh ban tih ïa u Uranium.
Haba kren sha ki lad pathai khubor u General Secretary u samla Rueben A Najiar u la ong, “Haduh mynta ka sorkar kam shym pat la pyni ba ki pyrshah ban tih ïa u Uranium bad ki don ki jingkynthoh jong ki myntri sorkar ba ong ba peit ïa ka rai u paidbah”.
“Mynta kane ka mat ka lah sdang ban khluid namar ba ngi lah pyni ïa ki dak ki shin mynta pat ki ong em da lei lei ruh bad ngim kwah shuh ban ngeit ïa ka ktien jong ki namar ba ngi kwah ban iohi da ka kam” ong u samla Najiar.
Shuh shuh u la ong, “Lada phi thmu shisha ban ym ai lad ban khlong ïa u Uranium napoh ka jylla Meghalaya pyni da kam da kaba pass ïa ka Resolution hapoh Assembly knang ba kan long kawei ka kyrwoh sha ka sorkar India ba kum ka jylla ngin ym ai lad ïa ka sorkar India ban tih ïa u Uranium hapoh ka jylla” u la ong,
“Kane ka mat kam dei tang jong ka sorkar hynrei kadei lang ruh jong baroh lai tylli ki Autonomous District Council jong ka jylla ba kin pyrshah bad shim lang ruh ia ka rai ban mynjur da ka Resolution ha ki ïing dorbar ha KHADC, JHADC bad GHADC” ong u samla Rueben.
Shuh shuh u samla Rueben u la ong, U Uranium um don tang ha Khasi Hills hynrei u Uranium belt u don ha Jaintia bad u don ruh ha ri lum Garo ruh bad ka jingtih ïa kano kano ka bynta kan ktah hi ïa baroh ka jylla bad kane ka mat ki lai ADC kidei ban shim khia.
Ha Meghalaya ngi don ka aiñ ba kyrpang namar ba ngi hap hapoh ka khyrnit ba hynriew ha kaba ki jaka la long trai da ki riew shimet bad ki mar poh khyndew ruh kidei jong ki briew shimet bad kam shym la dei jong ka sorkar India ne sorkar Jylla, ong u samla Rueben.
Ha kine ki khyndiat sngi ngi la pyni ba ka don ka jingthied jaka ha Domiasiat bad ki don ruh ki briew jong ka sorkar kiba don ne kiba ju ïa ïaid ïa ïeng bad kiba ju leit sha South West Khasi Hills ban ïa kren bad ki briew ba kidei ban ai lad ban tih Uranium bad ki tyrwa ruh da ki song pisa kiba heh la kdew u samla Rueben.