Mawkyrwat, Naitung 14: Kawei ka jingjia kaba sngewsih bad ba shyrkhei ka la jia ha shnong Mawkhan, South West Khasi Hills District, ha kaba kawei ka longkmie kaba 56 snem ka rta ka la duh noh ïa la ka jingim hadien ba ka la shah dung da ka tari ha la u hynmen trai.
Katkum ki khubor ba la ïoh na u Bah B. Jyrwa, MPS, Superintendent jong ki Pulit ka South West Khasi Hills District ula ong ba kane ka jingjia ka la jia ha ka por kumba 6:40 baje mynstep. “Uba la leh ïa kane ka kam la tip kyrteng kum u Bailing Wahlang, 62 snem ka rta, katba ïa ka lanot la tip kyrteng kum ka Snity Wahlang, 56 snem ka rta”, ong u SP.
La ong ba hadien ba u la dung ïa la ka para da ka tari, u Bailing Wahlang u la phet krad na katei ka jaka. Haduh mynta, ki Pulit ryngkat bad ki bor shnong ki dang pynlong ïa ka jingwad bad ka jingtohkit ban lap ïa u.
Watla katei ka jingjia ka la jia ha ka por mynstep, hynrei ka daw kaba la pynlong ïa kane ka jingjia haduh mynta ym pat tip satia. Tang shu ïoh jingtip, ki paidbah shnong bad ki bor shnong ki la pyntip mar mar sha ki Pulit kiba la poi sha katei ka jaka ban pynlong ïa ka jingtohkit bad ban lum ïa ki sabut kiba donkam.
Hadien kane, la pynkit noh ïa ka Snity Wahlang sha Civil Hospital, Mawkyrwat hynrei namar ka jingmynsaw kaba jur bad ka jingphlei snam kane ka longkmie ka la khlad noh.
Katkum ki jingïoh lum jingtip, ka kong Snity Wahlang ka la iehnoh shadien ïa 7 ngut ki khun, kiba kynthup ïa 5 ngut ki kynthei bad 2 ngut ki shynrang.
Ki Pulit ki la register case bad ki dang pynlong ïa ka jingtohkit kaba bniah halor kane ka jingjia, katba ka jingwad ïa u Bailing Wahlang uba la phet krad ka dang ïaid shakhmat.
