Na ka `12 sha ka `1500: Ka Meghalaya ka pynkhih ïa ka dor jong u sohtrun ha ka Delhi Fest

Shillong, Naitung 11: Ka jylla Meghalaya ka pyni ïa ka jingroi jong ka ïoh ka kot jong u soh trun ha khmat ki national retailers bad exporters, da kaba pynpaw kumno ïa u soh uba kamai tang kumba T.12 shi kilo ha ka khyrdop jong ka lyngkha rep lah ban pynkylla sha ki mar kiba shongdor haduh T.1,500 shi kilo ha ki iew pyrthei ne international markets.
Kane ka khubor ka la wan ha ka jingplie ïa ka Meghalaya Pineapple Festival kaba saw ha Dilli Haat ha ka 10 tarik Naitung, ha kaba u Myntri Rangbah ka Jylla Conrad K. Sangma bad u Myntri ka Sorkar Pdeng ba peit ïa ka DoNER u Jyotiraditya M. Scindia ki la pyni ïa ki soh trun ba thiang tam jong ka jylla kum ka khana jong ka jingjop ha ka jingpynkiew dor bad ka jingïadei bad ka ïew ka hat. Ha kane ka tamasa kaba lai sngi ki don kumba 50 ngut ki nongrep bad 50 ngut ki nongseng kam seng jam na kane ka jylla Meghalaya kiba ïashim bynta.
U Sangma u la ong ba kane ka tamasa ka la nang kiew sha ka rynsan kaba pynïasoh beit ïa ki nongrep bad ki retailers, food processors, e-commerce bad ki ïing shalan marbam shabar ri.
Ka jylla Meghalaya ka rep ïa u soh trun ha palat 12,600 hectare, kaba pynmih palat 1.4 lak metric ton ha ka shisnem.U jait soh uba la tip na ka bynta ka jingthiang bha kaba long haduh 18° Brix, u la paw kum uwei na ki mar rep ba pawnam jong ka Meghalaya.
Ka sorkar ka la ong ba ka jingbei tyngka ha ka jingpynkhreh bad ka jingpynïaid iew ka la pynkiew shibun ïa ka jingmih.Nalor ba u soh trun u ïaid iew haduh T.1,500 shi kilo ha Europe, ïa u soh trun individually quick frozen (IQF) la die haduh T. 640 shi kilo, kaba pynpaw ïa ka jingmyntoi na ka jingkiew dor ban ïa ka ba shu die ïa ki soh ne raw fruit.
Ki nongrep soh truh hapoh ka jylla mynta la kyrshan da palat 500 tylli ki seng treilang jong ki nongrep ne (farmers cooperatives) kaba la wanrah lang haduh shi lak ngut ki nongrep.Napdeng ki nongrep kiba la jop ka dei ka Jirang Organic Agro Farmer Producer Company kaba don ha Ri-Bhoi, ha kaba 433 ngut ki nongrep jong ka ki pynbiang ïa ki mar rep sha ka Lulu Group, Reliance Retail, Safal bad Blinkit.Ka FPO ka pyntreikam ruh ïa ka first aseptic pineapple pulp unit ha Meghalaya.
U soh trun jong ka Meghalaya u la dep ban poi sha ki iew ha Dubai, ha Abu Dhabi, Kuwait bad Sharjah.Ha u bnai ba la dep, ka Union Finance Minister ka Nirmala Sitharaman ka la kaweh lama ïa ka jingshalan ïa ki soh organic kiba kit ar ton na Jirang sha ka Lulu Retail ha Dubai.Mynta ka jylla ka thmu ban wanrah shi lak hektar hapoh ka jingrep organic ha u snem 2028.
Naduh ba la sdang ha u snem 2023, kane ka tamasa ka la nang kiew stet.Ka jingpynmih jong u snem ba la dep ka la wanrah ïa ki jingïatreilang ha ka liang ka jingïaid ïew bad ka Reliance Fresh, Amazon Karigar bad Blue Tokai, kaba pyni ïa ka bynta kaba nangroi jong kane ka jingïalang ha kaba plie ïa ki iew thymmai na ka bynta ki mar rep jong ka Meghalaya.