Kyntu u Myntri ïa ki BSF ban pynkhlaiñ talasi, thaw Task Force bad pyndep ka jingker sainar ha khappud

Shillong, Naitung 10 : U Myntri ka Tnad Animal Husbandry u Bah Sanbor Shullai ha ka sngi Thohdieng, ula pyntip ba ula bthah ïa ki shipai BSF ba kin pynkhlaiñ ïa ka jingtalasi ha ki jaka khappud, ban thaw ïa ki Special Task Force ha man ki District bad ban jur ïa ka jingdonkam ban pynkloi pyndep ïa ka jingker sainar khnang ban tehlakam ïa ka kam khaïi tuh ïa ki masi sha Bangladesh.
U Bah Sanbor ula pyntip ïa kane hadien ka jingïalang bad u Inspector General (IG) ki BSF ha ryngkat ki heh Ophisar na ka Tnad Animal Husbandry.
“Dang ha kine ki khyndiat sngi, ki la mih ki khubor ha Social Media ba kynnoh ïa ka jingshyrkhei ki kam khaïi tuh ïa ki masi. Nga la thoh mardor sha u IG ki BSF. Mynta ka sngi ngi la ïashong syndon da ka jingïalang bad ngi la ïakren bun kiei kiei” ïathuh u Bah Sanbor.
U Myntri u ïathuh ba kawei na ki kam ba kongsan ba la ïakren ka long ban pynkhlaiñ ïa ka jingpeit thuh bad jingtalasi ha ki jaka kiba jur ka jingkhaïi tuh.
“Ngi la kyntu ïa ki bor shipai BSF ba kin pynkhlaiñ ïa ka jingtalasi ha ryngkat ka jingïatreilang bad ka Tnad Pulit bad ki Border Magistrate” ula ong.
“Ngi la ïakren ban buh noh da ki check point ha ki jaka kiba jur ka jingkhaïi tuh ïa ki masi, ka ban long hapdeng ki BSF, ki Pulit bad ka Tnad Veterinary” bynrap u Bah Sanbor.
U Myntri ula pyntip ruh ba ula dep ai ka jingbthah ban thaw noh mardor ia ki District-Level Tast Force ki ban bat ïa ki masi ba khaïi be-aiñ.
“Nga la kyntu ïa ki Ophisar ba kin thaw mardor ïa ki Special Task Force kaba long kat kum ki Rule ha baroh ki District ba kin bat ïa ka jingkit ïa ki masi ba la kurup. ïa kine ki masi ba ïoh kurup dei ban wanrah sha ka Animal Shelter jong ka Tnad” ula ong.
Haba batai bniah, ula ong “Kat kum ka SOP bad ka jingpynbna ba la pynmih da ka Tnad Animal Husbandry & Veterinary, dei ban thaw ïa ka Special Task Force ha baroh ki District ban kit ïa baroh ki masi ba la ïoh kurup sha ki Animal Shelter. Ki dkhot ka Task Force kin kynthup ïa ki BDO jong ki C&RD Block kum ki Chairman, ha ryngkat ki O/C jong ki Police Station bad ki Veterinary Officer kum ki Dkhot. Kiwei pat ki dkhot kin kynthup ïa ki District AH & Veterinary Officer bad ki Sub-Divisional AH & Veterinary Officer”.
Halor ki jingtei ha khappud, u Bah Sanbor ula ïathuh ba ka Sorkar kan pynsted noh ïa ki kam ker sainar ka ban pynshong nongrim halor ki jingtip ban sa ai da ki BSF.
“Da kaba pynshong nongrim ïa ki jingai jingmut jong ka Tnad bad ki BSF, ngin sa pynsted noh ïa ka jingker sainar. Kat kum ki record, ha ri-lum Khasi bad Jaintia, ki dang sah sa 27 km ki bym pat pyndep ïa ka jingker sainar katba ha ri-lum Garo ki dang sah sa kumba 7 km tam” ula ïathuh.
“Kumta, ki bor shipai BSF kila kyrpad ïa ngi ba ngin ai ïa ki jingtip kiba bniah halor ki jaka kiba dang ieh ban ker sainar” ïathuh u Bah Sanbor haba bynrap ba la aipor 13 sngi ïa ki shipai BSF ba kin aiti ïa ki jingai jingmut ha ka ban pyndep noh ïa ka jingker sainar ha kine ki jaka ba dang sah.
U ïathuh ba kan sa don biang ka jingïalang bad ki BSF hadien 13 sngi.