Wan hakhmat eh ka SWGH ha ka SIR, kot 14.43 lak tylli ka jingsam ïa ki EF haduh ka sngi Palei

Shillong, Naitung 09 : Ka Meghalaya ka la kot sha ka 61.45 persen ha ka jingpyntreikam ïa ka Special Intensive Revision (SIR)-2026, ha kaba ka South West Garo Hills ka la long ka distrik kaba hakhmat tam ha ka jingpoi jong ki Enumeration Form (EF) sha ki nongthep vote.
Katkum ka kaiphod ba la pyllait paidbah da u Chief Electoral Officer (CEO) ha ka step sngi Palei la ïathuh ba la dep ban sam 14,43,818 tylli ki Enumeration Form na ki 23,49,645 ngut ka jingdon ki nongthep vote ha ka jylla. Kumba long mynta, kiba sah ban sam ïa ki EF ki long satang 9,05,827 ngut ne kumba 38.55 persen.
La ïathuh ba ka jingpynpoi ïa kine ki form sha ki ïing ki sem ka dang ïaid shakhmat lyngba 3,551 ngut ki Booth Level Officer (BLO), ha kaba uwei pa uwei u BLO u la sam ha ka jingïakheiñ paidbah kumba 407 tylli ki form. Katkum ka jingïakheiñ, uwei u BLO u peit ruh ïa kumba 661.69 ngut ki nongthep vote.
Shuh shuh la ïathuh ba ki form ba la dep lum la sdang ban digitize bad haduh mynta 1,98,307 tylli ki form, lane 8.44 persen na baroh ki nongthep vote, la dep ban pynrung ha ka system.
Haba phai sha ka jinglum jingkheiñ ha ka liang ki distrik, ka South West Garo Hills ka long kaba hakhmat eh da kaba la dep sam ïa ki form sha 88.36 persen na ki 1,08,883 ngut ki nongthep vote. Ka North Garo Hills ka bud da 77.96 persen, katba ka West Jaiñtia Hills ka poi sha 72.16 persen.
Ka East Garo Hills bad Ri-Bhoi ruh ki la tam ïa ka 67 persen ha ka jingpyntreikam.
Ha kajuh ka por, ka East Jaiñtia Hills ka la wan kham hadien da kaba la sam tang 44,764 tylli ki form na ki 1,04,417 ngut ki nongthep vote, kaba long 42.87 persen.
Ha East Khasi Hills, kaba dei ka distrik kaba bun tam ki nongthep vote ha jylla da 6,32,146 ngut, ka jingsam ïa ki form ka la kot sha 53 persen, katba ha West Garo Hills ka long 56.32 persen.
Kiwei pat ki distrik kiba kynthup ïa ka South Garo Hills, Eastern West Khasi Hills, South West Khasi Hills bad West Khasi Hills ki la kot hapdeng 58 haduh 63 persen.
Ha ka jingdigitize ïa ki form, ka South West Khasi Hills ka long kaba hakhmat da 17.88 persen, bud sa ka Eastern West Khasi Hills (16.66 persen) bad ka South Garo Hills (15.08 persen) katba ka West Jaiñtia Hills pat ka dang don tang 1.92 persen.
Katkum ka kaiphod, ka North Garo Hills ka dei ka distrik ba uwei u BLO u peit ïa kiba bun tam ki nongthep vote, kata 816.75 ngut, katba ha South West Khasi Hills uwei u BLO u peit tang ïa 563.58 ngut.
Ha kajuh ka por, ki BLO ha South West Garo Hills ki la sam bun tam ki form, da ka jingïakheiñ 573 tylli uwei pa uwei, katba ha East Jaiñtia Hills uwei u BLO u la sam tang kumba 285 tylli ki form.
U Chief Electoral Officer u la kyrpad ïa ki paidbah ba kin ai ka jingïatreilang bad ki Booth Level Officer ha ka por ba ki leit jurip, bad u la kyntu ruh ban pyndonkam ïa ki ECINET bad Voter Helpline mobile app ban peit ïa ki jingtip bad ka jingïaid shaphrang jong ka kam.