Shillong, Naitung 21: U Bah Adelbert Nongrum, MLA jong ka North Shillong, uba la mih noh na ka KHNAM ha kine ki sngi kiba ladep, un leit pynïasoh noh bad ka Sng Voice of the People Party (VPP), ka Party ba la seng da u Bah Ardent Miller Basaïawmoit bad ka Kynhun ha ka snem baladep.
Ki tyllong khubor ki ïathuh ba ka la don ka jingïakynduh hapdeng kine ki arngut ki CEM barim ka KHADC ha kine ki sngi baladep ban ïakren ïa pynbeit ïa kane ka jingwan pynïasoh u MLA ba marwei jong ka KHNAM.
Shuh shuh la ïathuh ba ym tang u Bah Adelbert u ban leit pynïasoh, hynrei ki paralok jong u kiba ju kyrshan ïa ruh kin don kiba leit bud lang ban pynïasoh sha ka VPP.
Kiba pule bha ïa ka saiñpyrthei ha ka jylla kiba la ïoh jingtip halor kane ka jingthmu jong u Bah Adelbert ban leit rung noh sha ka VPP, ki la ong ba kane ka jingleit jong u MLA North Shillong ka long kaba biang bha, namar ba u Bah Adelbert bad u Bah Ardent ki ïasyriem baroh arngut ka rukom treikam bad ka pyrkhat pyrdaiñ, khamtam eh ïa ka mynsiem ieit ri bad ka jingshlur jong ki ban kren beit ïa ka jingshisha.
Ha ka snem 2014 hadien ba ka elekshon MDC hadien ba ka HSPDP, ka KHNAM, ka UDP ki la ïatreilang bad thaw ïa ka Executive Committee ha KHADC, ka la don ka jingkhmih lynti ba u Bah Ardent un long kum u CEM bad u Bah Adelbert un long u Dy. CEM. Hynrei u Bah Adelbert u la ïapeiñ noh ïa ka shuki sha ki para MDC jong u. Hynrei ha ki 6 bnai ba u Bah Ardent u la long kum u CEM ha kitei ki por, u Bah Adelbert u la long u nongkyrshan ba radbah jong u.
La sngewthuh ruh ba shen kan sa long ka jingïalang jong ka VPP ban pdiang sngewbha ïa u MLA North Shillong sha ka Party.
