SHILLONG, Naitung 08: Ka Khasi Students’ Union, Mangalore Unit ka la pynkut noh ïa ka 3rd Hynñiewtrep Sports Meet 2026 da ka jingïashim bynta ba shitrhem jong ki samla kiba la pyni ïa ka mynsiem jong ka jingïatylli bad jingïaieid para Khasi.
Kane ka Hynñiewtrep Sports Meet 2026 ka la long ha ka 05 tarik u Naitung 2026 ha Milagres Ground, Mangalore.
Ha kane ka sngi la wan Kongsan da u Samla Donboklang Nongphud, President ka KSU Bengaluru Unit, uba la ai jingkren halor ki bynta kiba kongsan kiba ïadei bad ka bha ka miat jong ki Hynñiewtrep kiba shnong bad trei ha Karnataka.
Haba ai jingkren u la kyntu ïa baroh ki khun ka Bri u Hynñiewtrep kiba don ha Karnataka ba kin ïa tylli, ïa snohkti lang bad ban don ka mynsiem ïarap mar kylliang, namar haba im shabar ka jylla, ka jingïatylli ka long kaba donkam tam ban ïada ïa ka jinglong tynrai, ka hok bad ka bha ka miat jong ka jaitbynriew.
U la kyntu ruh ïa ka Sorkar Meghalaya ba kan shimkhia ban pynurlong kloi ïa ka Meghalaya House ha Bengaluru, namar kane kan long ka jingïarap kaba khraw ïa ki samla pule, ki nongtrei, ki nongpang bad baroh ki nong Meghalaya kiba don ha Karnataka.
Shuh shuh, u la pynpaw ïa ka jingsngewkhia halor ka jingbun ki samla bad ki paidbah na Meghalaya kiba wan sha Karnataka ban pule bad trei. U la ai jingmut ba shuwa ban wan sha Karnataka, dei ban bishar bha ïa ki jingïohkam, ki jaka pule, ki agency bad ki jaka sah, namar ha kine ki sngi la jur bha ki kam thok bad ki scam. U la kyntu ïa baroh ba kin long kiba husiar bad kiba peitngor.
Shuh shuh ka KSU Mangalore Unit ka la ai khublei kyrpang ïa baroh ki dkhot, ki nongkyrshan, ki paidbah, ki riew rangbah, ki volunteer, khamtam ïaka KSU Sengkmie ba ju don lang bad bad baroh kiba la ai ka jingïatreilang kaba pura ban pynlong ïa kane ka Sports Meet kaba jop.
Ka Seng ka ai ruh ka jingïaroh bad jingïakhublei ïa baroh ki nongjop bad ïa baroh ki kynhun kiba la shim bynta ha ka jingïalehkai bad kiba la pyni ïa ka jingïatreilang, ka akor bad ka jingïalehkai kaba khuid.
