Ïoh jingmyntoi ki nongrep na ki symbai ba la sam da ka jingkyrshan ka sorkar pdeng bad jylla

Shillong, Naitung 07: Ka tnat thungsoh bad kba, South West Garo Hills, ka la thmu ban pynmih ïa ki skhim rep bun tylli kiba bapher bapher kaba ïoh jingkyrshan na ka sorkar kmie bad sorkar jylla da kaba sam ïa ki tiar rep tiar riang bad ki jingdonkam na ka bynta ka rep ka riang sha ki nongrep kiba ïoh jingmyntoi ha kylleng ki katto katne ki shnong ha kane ka distrik.
Ki nongrep ki la ïoh ïa ki symbai jhur, dawai ban kynshait ha ki jhur, ki symbai soh ki soh bapher bapher, ki tiar ban thung ïa u sohmarit bad kiwei kiwei ki tiar rep tiar riang na kane ka skhim, napdeng kitei ki tiar rep kane ka skhim ka la thmu ban pynbiang ïa ka rukom thung ïa ki jhur, thung soh bad kiwei kiwei ki jingthung ki bym ai dawai.
Kane ka skhim jong u Myntri Rangbah ne ka Chief Minister’s Farm Plus Scheme ka la sam ïa ki katto katne ki tiar thung jingthung, kynthup ïa u sohmarit, cashew bad cinnamon sha ki nongïoh jingmyntoi ha ki shnong kum ka Raksanara, Kalaichar, Balughat, Josipara, Merenggipara, Chibongnara, Taranara bad Garagre.
La bynrap ba hapoh ka Centrally Sponsored Mission for Integrated Development of Horticulture (MIDH), ka pynïoh ïa ki tiar ban thung ïa u soh dragon sha ki nongïoh jingmyntoi ha Kumligaon.
Kane ka skhim kaba dei kum shi bynta jong ka sorkar ka trei shitom ban bteng ban kyntiew ïa ka rep ka riang ban pynbun jait ka ïoh ka kot na ka rep bad bad ban pynkhlaiñ ka lad ka lynti ban ïoh pisa ki nongrep ha kylleng ka South West Garo Hills.