Hadien ka jingai por ka JCMDA lai bnai ïa ka sorkar, yn shim rai ka JCMDA da ka rai u paidbah

Khliehriat Naitung 07: Ka jingai por jong ka Jaiñtia Coal Miner and Dealer Association (JCMDA) ïa ka sorkar jylla ka la kut mynta ka sngi ha kaba ka Association dewïong kaba na East Jaiñtia Hills District ka la ai por ïa ka sorkar, kata naduh ka 7 tarik u bnai ïaïong 2026 bad ïaid ka por haduh lai bnai kynthih mynta, katkum ka jingkren u General Secretary ka JCMDA, u bah Samanbha Supooh la sngewthuh ba ka kam dewïong ka dang ïaid shakhmat.
Na ka liang u General Secretary JCMDA u ai khublei ïa ki paidbah ka ri lum Jaiñtia, khamta kiba na East Jaiñtia Hills District kiba la ïa don ryngkat lang bad ka Association ha kane ka jingiaid lynti na ka bynta ka kam dewïong, u ai khublei ruh ïa ka sorkar jylla ba la lam khmat da u Myntri rangbah, u Conrad .K.Sangma uba la shim khia ïa ka kam ba ïadei bad ka kam dewïong, u la pynsngew ruh ba ka JCMDA kan sa pynlong ïa ka jingialang paidbah ha ka 11 tarik mynta u bnai naitung ha madan Teilang Football Ground ha Dkhiah bad ha kane ka jingialang ka JCMDA kan sa pynsngew paidbah ïa ka kaiphot halor ka jingiaiad lynti ka Association ha kaba ïadei bad ka kam dewïong bad yn shim ruh ïa ka rai jong ki paidbah ha kaba ïadei bad ka kam dewiong, ka Association ka kyrpad ïa baroh ki paidbah kiba im ja kpoh na ka kam dewïong ba kin ïa poi lang sha kane ka jingialang ha katei ka sngi.
Na ka liang ka JCMDA ka la ong ba hadien ka jingiakynduh bad u myntri rangbah ka jylla myn ha ka 22 tarik u bnai jylliew 2026, ka Association ka la iohi ïa ka jingshim khia ka sorkar bad ka Association ka la ioh jingtip ruh ba u Myntri rangbah ka jylla, Conrad Sangma lem bad ka MLA Sutnga-Saipung, ka kong Santa Mary Shylla ki la leit sha Delhi ban iakynduh ïa u myntri ka sorkar pdeng uba dei u Minister of coal and minister of mines ban iakren ïa ki kam kiba iadei bad ka kam dewïong ha jylla Meghalaya.