Nongpoh, Naitung 06: U Bah Sosthenes Sohtun Myntri sorkar ba dei ruh u MLA ka Jirang u la ong ba la slem kala don ka jingkyrpad ban buh noh kawei ka Regional Officer jong ka tnad Meghalaya State Pollution Control Board ban peitngor ïaka jingpynkheiñ kyndon ki karkhana ha Byrnihat.
Haba kren sha ki lad pathai khubor naka liang u Myntri u la ong ba un sa buh daka jingthoh sha u Myntri Rangbah ka jylla Meghalaya bad ruh ban don ka jingïakynduh bad ka jingjurip lang naki bor jong ka Meghalaya bad Assam, namar ki karkhana kiba pynjaboh ïaka thaiñ Byrnihat kim dei tang naka jylla Meghalaya hynrei ki dei ruh na Assam, khnang ba yn lah ban tehlakam ïaka jingjaboh bad ban peitngor ïaki karkhana ban ïada ïaki paid nongshong shnong ha katei ka thaiñ.
