Nongstoiñ, Naitung 06: Ka jingsangeh treikam jong ka synjuk jong ki rangbah shnong kaba nyngkong eh ha ka thaiñ Langpih kaba la tip kum ka Village Administrator Organisation Langpih Circle, ka la pynlong ïa ki paidbah ba kin sah ha ka lyngngoh bad ka la pynlong ruh ïa ki shnong ki thaw ba kin duh noh ïa ka jingïatylli ha baroh ki liang.
Bun ki nongshong shnong katei ka thaiñ haba ïakren bad u nongthoh khubor halor ka jinglong jingman jong ka thaiñ, ki la pynkynmaw ba ha ki snem ba la dep naduh ba ki nongsynshar shnong ka thaiñ ki la thaw ïa ka VAOLC kaba la ïalam da u bah Trasdingland Nonglang, baroh ki nongsynshar shnong bad ki paidbah ka thaiñ ki don ka jingïatylli lang kawei ha baroh ki liang.
U Bah S.Synchiang u la ong, “Wat ha ki por ba ka sorkar Assam ka dang ïakhun tyngeh ban pynsangeh jubor ïa ka jingpyntrei ïa ka surok na Pyndensohstap shaduh Langpih, da kaba phah da ki pyrton pulit man la ka sngi ban pynthut. Hynrei da ka jingïeng rangbah bad ka jingïatylli jong ki nongsynshar shnong kiba don hapoh ka shatri jong ka VAOLC bad ki paidbah, ki pulit Assam kim lah ban leh ei ei”.
U Bah Synchiang u la pynkynmaw ruh ba haduh ka por ba u samla Pynskhem Nongshlong ryngkat ki paralok jong u ki pynlong ka jingshah thngan khlem buh por ha Langpih, ki pulit Assam ki la wan tur biang ban pynthut bad ban pynpra ïa ka dara ba ki shong shah thngan. Hynrei na ka jingbym ailad ki paidbah ki nongïalam bad ki dkhot jong ka VAOLC, ki pulit Assam ki hap ban pyndem tdong.
“Ki paidbah katei ka thaiñ ki la pynkynmaw ruh ba dei naduh ba la lah ban pynbha ïa ka surok na Pyndensohstap sha Langpih, la dep shna ïa ka market Complex, ïa ka Raidmynsaw Upper & Secondary School bad kiwei kiwei, ba ki nongïalam katei ka synjuk ki rangbah shnong kim shym la trei shitom shuh ba ki riew shim kabu na kylleng ki jaka ki la sdang ban wan leh trai khlieh ha man la ki kam bad ban wan batai stad ïa ka jinglong jingman jong ki nongshong shnong ha katei ka thaiñ tang na ka bynta ban ïoh jingmyntoi”.
“Na ka liang kiba bun ki riew paidbah ha Langpih ki kyntu ïa u bah T.Nonglang kum u nongïalam ba nyngkong eh jong ka VAOLC, ba un sdang biang ban pynim ïa katei ka Organisation bad ban treikam biang, khnang ba ka jingïatylli kan wanphai biang sa shisien ha ka thaiñ baroh kawei”, u la ong.
Hynrei halor kane ka bynta, u Bah Serbilin Lyngdoh uwei na ki riew rangbah jong katei ka thaiñ, haba ïakren bad u nongthoh khubor u la ong ba ha ka jingshisha naduh ba treikam pura ka Synjuk Nongsynshar Shnong Hima Nongmynsaw bad ba u Bah T.Nonglang lem bad kiwei kiwei ruh ki riew rangbah hapoh ka thaiñ ki la wan ban ïasnohktilang, ki kam ki jam baroh khamtam ha kaba ïadei bad ka shongsuk shongsaiñ ki la ïaid ryngkat ryngkat bad ka Synjuk.
“Ha ki por ba kham mynshwa ka don katei ka VAOLC kaba ki paidbah Langpih ki tip kum ka Synjuk. Hynrei, hadien ka jingmih ka Synjuk Nongsynshar Shnong Hima Nongmynsaw, kiba bun ki kam kiba ïadei bad ka thaiñ hi la ïa pynbeit ïakren hapoh ka Synjuk Nongsynshar Shnong Hima Nongmynsaw. Ki riew rangbah kum u Bah Nonglang sordar Mawsikar bad kiwei kiwei ki long kiba la kloi ban ïa pyni ha kiba bun ki kam bad ngi long kiba shitylli”, ong u Bah Serbilin Lyngdoh.
