Shillong, Naitung 6 : Ka jinghiar ka dor u synsar ha ki ïew ïadie ïathied ka la buh jingeh ïa kiba bun ki nongrep ha ka Jylla bad na kane ka daw, ki la sdang ban wad da kiwei pat ki lad ban ïohnong da kaba phai khmat sha kiwei pat ki mar rep.
Ha shnong Rasong, kaba hap hapoh ka Mawkynrew C&RD Block, la shim ïa ka sienjam ban sdang rep ïa u Black Cardamom, uba la khmih lynti ba un long uwei na ki jingthung uba lah ban kyntiew ïa ka ïoh ka kot jong ki nongrep.
Kane ka sienjam ka la urlong lyngba ka jingïatreilang ka shnong Rasong bad ka YoCa Spices, ha kaba la pynshlur ïa ki nongrep ban sdang rep ïa u Black Cardamom, uba ïahap bha bad ka mariang jong katei ka thaiñ.
Ha ka 04 tarik u Naitung, 2026, u MLA ka Mawkynrew Constituency, u Bah Banteidor Lyngdoh, ryngkat bad u Director ka YoCa Spices, Bah Afu N. Y. Jana, ki la sam haduh 5,000 tylli ki tynrai Black Cardamom sha 23 tylli ki longïing nongrep.
ïa ka jinglut ha kaba thied ïa kine ki symbai la pynlut hi da u MLA bad haba kren ha ka jingïalang ba la long ha Khmatlum Rasong, u Bah Banteidor u la ong ba ka jinghiar ka dor u synsar ka la ktah jur ïa ka ïoh ka kot jong ki nongrep kumta, ka jingwanrah ïa une u jingthung ba thymmai ka long shi bynta ban plie ki lad kiba thymmai bad ban pynkhlaiñ ïa ka kam rep.
U la kyntu ruh ïa ki nongrep ba kin shimkhia ïa ki jinghikai bad ki buit rep kiba ka YoCa Spices ka ai, khnang ba ha ki snem ban wan, ka shnong Rasong kan lah ban long kawei na ki shnong ba pawnam ha ka jingpynmih ia u Black Cardamom.
Na ka liang u Director ka YoCa Spices, u Bah Afu u la batai ba ka jinglong jong ka khyndew bad ka mariang ha Rasong ka biang bha na ka bynta ka jingrep Black Cardamom.
U la ong ruh ba ka kompani kan ïarap ha ka liang ka jingpyniaid iew ïa u mar rep bad ka dor ba la buh ka long T.800 shi kilo. Katkum ka jingïathuh jong u, ka jingrep Black Cardamom ka kham suk ban sumar bad ka lah ban ai jingïohnong kaba kham biang ïa ki nongrep.
Ki nongrep ka shnong Rasong ki kyrmen ba kane ka sienjam kan long ka jingïaid lynti kaba thymmai ban pynkhlaiñ ïa ka ïoh ka kot ki longïing bad ban pynduna ïa ka jingshaniah tang ha ka jingrep synsar.
