Mawkyrwat, Naitung 06 : Ka jingjah jong kawei ka longkmie kaba kyrteng ka Joit Kharlyngdoh, 76 snem karta na ka shnong Jakrem, South West Khasi Hills District ka la kynjoh mynta la 2 sngi ha kaba haduh mynta ym pat shym la lap dien satia.
Kumban shu pynkynmaw ba kane ka longkmie, ka la jah ha ka 4 tarik u Naitung, 2026 ha ki por kumba 6 baje janmiet bad naduh kata ka por ka khlem wan phai ïing shuh. “Ha ka por ba ka jah ka la tap moh da ka jaiñ kyrshah, ka phong ruh ïa ki juti ar rong (shilliang da kawei ka rong bad shilliang da kawei ka rong).
Katkum ka jingïathuh jong u Myntri Shnong Jakrem, u bah Pascal Wahlang u la ong ba mynta ka sngi ka 6 tarik u Naitung, 2026 na ka liang ki paidbah ki la ïamih shnong ban wad ha kylleng ki jaka jong ka shnong kata ha ki jaka ba long khlaw, ki jaka ba don ki pung bad kiwei de ki jaka hapoh shnong hynrei da ka jingpyrshang jong ki ruh ym pat shym la lap dien satia.
Kum ka Dorbar Shnong, kan dang ïai pyrshang bad thaw ki lad ki lynti khnang ban shem ïa kane ka longkmie bad kumjuh ruh ka kyrpad ruh ïa ki bor jong ka aiñ ba kin ai lem ka kti ka mon ka kti ka diang ban wad ïa kane ka longkmie.
Namarkata, sa shisien ka Dorbar Shnong buh ka jingkyrpad ba lada don kino kino kiba ïohi ne lap ïa kane ka longkmie kin ban pyntip kloi katba lah sha ki Rangbah jong ka Shnong Jakrem ne phone ha kine ki nombor: 8787741202, 8837072958, 9366050946.
