Shillong, Naitung 05: Ki Booth Level Officers (BLOs) ki la dep ban sam palat 1.67 lak tylli ki Enumeration Forms sha ki longïing ha East Khasi Hills District kum shi bynta jong ka Special Intensive Revision (SIR) jong ka electoral roll.
Katkum ka kyrwoh na ka ophis u District Election Office, la kdew ba haduh ka 05 tarik Naitung 2026, la dep ban sam 1,67,253 tylli ki Enumeration Forms sha ki nongthep vote ha baroh 15 tylli ki Assembly Constituency jong ka district.
Ïa kane ka jingtrei la sdang naduh ka 30 tarik Jylliew bad ka kynthup ïa baroh 898 tylli ki polling parts ha East Khasi Hills. Ki BLO ki dang bteng ban leit haman la ki longing ban sam ïa ki form bad ban lum pat hadien ba la pyndap da ki nongshong shnong.
La buh por ba ïa kane ka jingpynbeit kyrpang yn pyndep noh haduh ka 29 tarik Naitung 2026.
Napdeng ki constituency, Pynursla (ST) ka la don bun tam ki form ba la dep sam, kata 22,004 tylli, bud sa ka Mawlai (ST) da 13,533 tylli bad Pynthorumkhrah (GEN) da 12,683 tylli.
Ha Sohiong (ST) la dep ban sam 12,521 tylli ki form, katba Mawrynkneng (ST) la dep sam 11,940 tylli nangta ha Mawsynram (ST) la dep sam 10,463 tylli, ha Nongkrem (ST) la dep ban sam 10,012 tylli, bad ha South Shillong (GEN) pat la dep ban sam 10,049 tylli.
Haba phai sha ki constituency ba don ha sor Shillong, ha West Shillong (GEN) la dep ban sam 9,574 tylli ki forms Nongthymmai (ST) 9,679 tylli, North Shillong (ST) 9,197 tylli.
Nangta ha Mylliem (ST) 8,892 tylli, Mawphlang (ST) 9,995 tylli, Mawkynrew (ST) 8,791 tylli, bad East Shillong (ST) 7,920 tylli.
Ha ka liang ka digitisation, haduh mynta la dep ban pynrung 6,707 tylli ki form ha ka system. Ka Mawphlang (ST) ka lamkhmat da 1,051 tylli ki form ba la digitise, bud sa ka Nongthymmai (ST) da 882 tylli bad Mawsynram (ST) da 870 tylli.
Ka District Election Office ka la pyntip ruh ba ka SIR Helpline ka la ïoh 17 tylli ki phone haduh ka 05 tarik Naitung, bad la lah ban pynbeit ïa baroh ki jingeh bad ki jingkylli ba la wanrah.
Ki ophisar ki la kyrpad ïa ki paidbah ba kin ai ka jingïatreilang pura bad ki Booth Level Officers ha ka por ba ki wan sha ki ïing jong ki, bad ba kin pyndap bad aiti noh ïa ki Enumeration Forms hapoh ka por ba la buh khnang ban pynthikna ïa ka electoral roll kaba thymmai bad kaba biang na ka bynta ka district.
