Khliehriat, naitung 04: Ka ophis jong ka District Sport Officer (DSO), East Jaiñtia Hills District, hynnin ka sngi ka la pynkut noh ïa ka District Level Inter-School Subroto Mukherjee Cup 2026 ha madan East Jaiñtia Hills District Sports Association (EJHDSA) Football Ground, Deiñchymrum, kaba la sdang naduh ka 16 tarik u Jylliew 2026
Haba kren ha ka prokram, u District School Education Officer (DSEO), East Jaiñtia Hills District, u bah R. Diengdoh, u la ai ka jingkhublei kitok kitrwaing ïa ki kynhun kiba la ioh rah ïa ka nam lahduh bad ong ruh ba wat lada jop ne rem ruh ha ka jingïakhun kan don don beit ka jingjop bad jingrem bad kaba donkam eh ka dei ka jingwan ban ïashihbynta bad dup long mlien ha ki kam sports, u ai khublei ruh ïa kito ki kynhun kiba khlem poi sha ka thong bad ai mynsiem ïa ki ba kim dei ban duh mynsiem bad kim dei ban duh jingkyrmen hynrei ki dei ban trei shitom ban poi sha ka thong ha kawei pat ka snem, shuh shuh, u kyntu ïa ki khynnah ba ki dei bunsien ban long kiba ïa ryntih bad bat ïa ka mynsiem ïalehkai kumjuh ruh ban kiew shaphrang kum kita ki nongshong shnong kiba don ka jingkitkhlieh ïa ka imlang ka sahlang.
Ha kane ka lympung ïalehkai jong ka District Level Inter-School Subroto Mukherjee Cup 2026 ha East Jaiñtia Hills District la iohi ïa ka jingwan ïashimbynta shitrhem jong ki hynriew tylli ki kynhun ïalehkai football kynthei bad shynrang kiba hapoh ka 15 snem kyrta, kiba hapoh ka 17 snem kyrta.
Ha ka jingïakhun ka Step By Step Secondary School and Wapung Higher Secondary School ka la rah ïa ka nam Champions ha ka thup jong kito kiba hapoh ka 15 snem kyrta bad kiba hapoh ka 17 snem kyrta na ka liang ki khynnah shynrang.
Ha ka jingïakhun jong kito kiba hapoh ka 17 snem kyrta pat na ka lïang ki kynthei (Girls Category), ka Lotus Secondary School ka la wan shakhmat bha.
Ha ka kynhun final jong kito kiba hapoh 15 snem na ka liang ki shynrang, ka skul Step By Step Secondary School ka la rah ïa ka nam Champion da kaba pynrem ïa ka Musniang Secondary School da 1 kol la zero, ka Wapung Higher Secondary School ka la jop da kaba pynrem ïa ka Seiñ Raij Tuber Higher Secondary School da kaba ïa shut tie breaker da 4 kol la 3 kol.
Ha ka kynhun jong kito kiba hapoh 17 snem kyrta ba na ka kynhun ki kynthei (Under-17 Girls_ category), ka Lotus Secondary School ka la rah ïa ka nam Champion da kaba pynliem ïa ka Khliehriat Higher Secondary School da 2 kol la zero kol (2 kol – 0 -kol).
Haba kut ka jingïalehkai final matches, la sam ïa ki prizes sha ki kynthun kiba jop bad ki khynhun kiba wan ba ar, ïa ka nam Best Goalkeeper na ka thup jong ka Under- 17 Girls Category, la rah da ka . Haphisuk Lyngdoh na Lotus Secondary School bad u Redeemingson Phawa na Wapung Higher Secondary Schoo na ka thup Under-17 Boys Category
La sam ruh ïa ki khusnam sha ki Best Goalkeeper bad Best Player of the Tournament 2026 ha kaba u Wanbanshan Lamare uba na Step By Step Secondary School u la rah ïa ka nam kum u Best Goalkeeper ha ka Under-15 Boys Category, u Redeemingson Phawa na Wapung Higher Secondary School u la rah ha ka thup jong ka Under-17 Boys Category bad ka Haphisuk Lyngdoh na Lotus Secondary School la ai ïa khusnam kum ka Best Goalkeeper ha ka thup jong ki Under- 17 Girls Category.
Na ka thup jong ka Under- 15 Boys Category, u Daowan Rymbai na Musniang Secondary Schoolu la shah jied kum u Best Player bad u Jefferson Phawa na ka thup Under-17 Boys bad ka Saphapaya Lyngdoh kum ka Best Player na ka thup jong ka Under 17 Girls.
Kiba la ïa don ryngkat ha kane ka sngi ki kynthup ka District Sports Officer (DSO), East Jaiñtia Hills District, ka kong S.M Rapsang, u District Public Relations Officer (DPRO), East Jaiñtia Hills District, u bah E.S. War, ki nongpynïaid ïa ka District Level Inter-School Subroto Mukherjee Cup 2026 bad kiwei kiwei.
