SHILLONG, Naitung 05: Ka kynhun ïalehkai table tennis jong ka Save Trees ka la ïoh ban rah ïa ka nam lahduh jong ka “8th All Meghalaya Masters TT Team Championships” ba la pynlong da ka Meghalaya Veteran Table Tennis Association (MVTTA) ban kynmaw burom ïa ka World Environment Day.
Ka sienjam ba phra jong kane ka lympung la pynlong ha Polo Stadium Shillong ha ka sngi Saitjaiñ, 04 tarik Naitung 2026, bad baroh ki nongïalehkai Table Tennis kiba la rangbah kiba la tip kum ki Masters, na ki District bapher bapher jong ka jylla Meghalaya ki la ïashimbynta kum ka kynhun.
Ki don 8 tylli ki kynhun kiba la ïashim bynta ba kynthup ïa ka Go Green, Stay Fit, Save Fuel, Swachh Bharat, Save Trees, Save Water, Save Earth bad ka Protect Nature.
Ka Save Trees ka la ïoh rah ïa ka trophy hapoh ka jingïalam jong u Bruce Marak. U pralok jong u, u Ratan Biswakarma u la pynliem noh ïa u Eros Kharshiing jong ka Save Earth da 3-0 ha ka final ban jop ïa kane ka trophy mynta u snem 2026. Kiwei pat ki dkhot jong ka kynhun ki long u Suraj Joshi, Kiran Thapa & Anand Kausal.
ïa ka Save Earth la ïalam da u Lamphrang L Nonglait, ryngkat ki paralok ba kynthup ïa u Arup Nag (na Tura), J Warbah, BR Dasgupta bad Eros Kharshiing.
U Arup Nag na Tura u la long u namtam ha kane ka lympung da kaba jop ïa baroh ki jingïakhun, bad u la khur ruh ïa ka khusnam Player of the Tournament. Ka kynhun jong ka Save Trees ka la pynliem noh ïa ka Save Earth da 3-2 ha ka final.
U Taraman Gurung, u nongïalehkai ba pawnam jong ki snem ba la dep, u la shah pynkup burom da ka khusnam ba kyrpang na ka bynta ka jingnoh synñiang jong u ha ka kam ïalehkai bad khamtam ha ka Table Tennis.
ïa ka jingïalang sam khusnam la pynïaid da u bah Gideon Kharkongor, ha ka jingïadonlang u bah A L Hek-MLA ka Pynthorumkhrah, kum u kongsan.
